விருதுநகர் மாவட்டம் சிவகாசியில் நடைபெற்ற போதை தடுப்பு விழிப்புணர்வு இருசக்கர வாகன பேரணியில் கலந்துகொண்ட பாஜக சிறுபான்மை பிரிவு தேசிய செயலாளர் வேலூர் இப்ராஹிம், தமிழகத்தில் போதைப்பொருள் புழக்கம் அதிகரித்துள்ளதாகக் குற்றம்சாட்டியுள்ளார்.
சிவகாசி மாநகராட்சிப் பகுதிகளில் பாரதிய ஜனதா கட்சியின் சார்பில் போதை ஒழிப்பு குறித்த விழிப்புணர்வு இருசக்கர வாகன பேரணி நடைபெற்றது. இதில் பாஜக சிறுபான்மை பிரிவு தேசிய செயலாளர் வேலூர் இப்ராஹிம் தலைமையில் 100-க்கும் மேற்பட்ட நிர்வாகிகள் மற்றும் உறுப்பினர்கள் கலந்துகொண்டனர். நகரின் முக்கிய வீதிகளின் வழியே இருசக்கர வாகனங்களில் பேரணியாகச் சென்ற அவர்கள், மதுபோதைக்கு எதிராக முழக்கங்களை எழுப்பி பொதுமக்களிடையே விழிப்புணர்வை ஏற்படுத்தினர்.
இதனைத் தொடர்ந்து செய்தியாளர்களைச் சந்தித்துப் பேசிய வேலூர் இப்ராஹிம், போதை ஒழிப்பு என்பது அரசு மற்றும் காவல்துறையின் நடவடிக்கைகளால் மட்டுமே சாத்தியமாகிவிடாது என்றும், இதில் ஒட்டுமொத்த மக்களின் பொறுப்புணர்வும் அவசியமானது என்றும் தெரிவித்தார். இளைஞர் சமுதாயத்தை போதையில் இருந்து மீட்கும் நோக்கில் பாஜக சார்பில் இந்த விழிப்புணர்வு யாத்திரை மேற்கொள்ளப்பட்டு வருவதாக அவர் குறிப்பிட்டார்.
மேலும், 1967-ஆம் ஆண்டு முதல் மதுவிற்பனை மூலம் அரசு வருவாய் ஈட்டும் நடைமுறை தொடர்வதைச் சுட்டிக்காட்டிய அவர், தமிழகத்தில் முழுமையான மதுவிலக்கு அமல்படுத்தப்பட வேண்டும் என்பதே பாஜகவின் நிலைப்பாடு என்றார். தேசத்திலேயே அதிகளவில் போதைப்பொருள் புழங்கும் மாநிலமாக தமிழகம் மாறுவதற்கு உரிய நடவடிக்கைகள் எடுக்கப்பட வேண்டும் என்றும், கஞ்சா மற்றும் மெத்தாம்பெட்டமைன் உள்ளிட்ட போதைப்பொருட்களின் புழக்கத்தை அரசு இரும்புக்கரம் கொண்டு அடக்க வேண்டும் எனவும் அவர் வலியுறுத்தினார்.