தமிழ்நாடு அரசுப் பணியாளர் தேர்வாணையத்தின் (TNPSC) 2026-ம் ஆண்டுக்கான குரூப்-4 தேர்வு அறிவிப்பு நாளை (அக்டோபர் 6) வெளியாக உள்ளது. இந்தத் தேர்வுக்காக லட்சக்கணக்கான தேர்வர்கள் எதிர்பார்த்து காத்திருக்கின்றனர். தமிழ்நாடு அரசின் பல்வேறு துறைகளில் உள்ள காலிப் பணியிடங்களை நிரப்புவதற்காக டிஎன்பிஎஸ்சி சார்பில் பல்வேறு போட்டித் தேர்வுகள் நடத்தப்பட்டு வருகின்றன. 2026-ம் ஆண்டுக்கான வருடாந்திர தேர்வு அட்டவணையில் இடம்பெற்றுள்ள 6 தேர்வுகளில் 5 தேர்வுகளுக்கான அறிவிப்புகள் ஏற்கனவே வெளியாகியுள்ளன.
அந்த வகையில், குரூப்-4 தேர்வுக்கான அறிவிப்பு அக்டோபர் 6-ம் தேதி வெளியாகும் என தேர்வு அட்டவணையில் குறிப்பிடப்பட்டுள்ளது. தேர்வு டிசம்பர் 20-ம் தேதி நடைபெற உள்ளது.
10 ஆயிரத்துக்கும் மேற்பட்ட பணியிடங்கள்?
கடந்த 2024-ம் ஆண்டு நடைபெற்ற குரூப்-4 தேர்வில் 4,662 காலிப் பணியிடங்கள் அறிவிக்கப்பட்டிருந்தன. இந்த ஆண்டு கூடுதல் பணியிடங்கள் அறிவிக்கப்படலாம் என்ற எதிர்பார்ப்பு தேர்வர்கள் மத்தியில் நிலவி வருகிறது.
சுமார் 10 ஆயிரம் காலிப் பணியிடங்கள் இந்த ஆண்டு குரூப்-4 தேர்வு மூலம் நிரப்பப்படலாம் என தகவல்கள் வெளியாகியுள்ளன. இருப்பினும், காலிப் பணியிடங்களின் இறுதி எண்ணிக்கை அதிகாரப்பூர்வ அறிவிப்பு வெளியான பிறகே உறுதியாகும்.
எந்தெந்த பதவிகள்?
குரூப்-4 தேர்வில் பொதுவாக இளநிலை உதவியாளர், தட்டச்சர், சுருக்கெழுத்து தட்டச்சர் (கிரேடு-3), கிராம நிர்வாக அலுவலர், வரைவாளர், பில் கலெக்டர், வனக்காவலர் உள்ளிட்ட பல்வேறு பதவிகள் இடம்பெறும்.
பெரும்பாலான பணியிடங்களுக்கு அடிப்படை கல்வித் தகுதியாக எஸ்.எஸ்.எல்.சி. தேர்ச்சி நிர்ணயிக்கப்பட்டுள்ளது. குறிப்பிட்ட சில பதவிகளுக்கு கூடுதல் கல்வித் தகுதி மற்றும் தொழில்நுட்பத் தகுதிகள் தேவைப்படலாம்.
15 லட்சம் பேர் விண்ணப்பிக்க வாய்ப்பு
கடந்த குரூப்-4 தேர்வுக்கு சுமார் 13.89 லட்சம் பேர் விண்ணப்பித்திருந்தனர். இந்த ஆண்டு தேர்வுக்கு சுமார் 15 லட்சம் பேர் விண்ணப்பிக்கலாம் என எதிர்பார்க்கப்படுகிறது. அறிவிப்பு வெளியானதும் காலிப் பணியிடங்கள், கல்வித் தகுதி, வயது வரம்பு, விண்ணப்பிக்கும் கால அவகாசம், தேர்வு முறை உள்ளிட்ட முழுமையான விவரங்கள் தெரியவரும்.