தஞ்சாவூர் பழைய பேருந்து நிலையத்தில் உலக தொழிற்சங்க சம்மேளனத்தின் 81-வது ஆண்டு அமைப்பு தின விழா வெள்ளிக்கிழமை நடைபெற்றது. விழாவுக்கு ஏஐடியுசி மாநிலச் செயலாளர் ஆர். தில்லைவனம் தலைமை வகித்தார். சிஐடியு மாநில துணைத் தலைவர் சி. ஜெயபால், உலக தொழிற்சங்க சம்மேளனத்தின் கோட்பாடுகள் மற்றும் அதன் நோக்கங்கள் குறித்து விளக்கிப் பேசினார்.
தொழிலாளர்களின் உரிமைகள் குறித்து உறுதி
விழாவில் தொழிலாளர்களின் உரிமைகள் மற்றும் சமூக நலன் தொடர்பாக பல்வேறு கோரிக்கைகளை வலியுறுத்தி தொழிற்சங்க நிர்வாகிகள் உறுதிமொழி ஏற்றுக்கொண்டனர். அதன்படி, சம வேலைக்கு சம ஊதியம் வழங்க வேண்டும், பணியிடங்களில் பாதுகாப்பை உறுதி செய்ய வேண்டும், அனைவருக்கும் கல்வி, வேலைவாய்ப்பு, சுகாதாரம், வீடு மற்றும் குடிநீர் ஆகிய அடிப்படை வசதிகள் கிடைக்க வேண்டும் என வலியுறுத்தப்பட்டது. மேலும், ஐ.எல்.ஓ. இணக்க விதி 8-ஐ ஒன்றிய அரசு அமல்படுத்த வேண்டும் என்றும், கருத்துரிமை, பேச்சுரிமை, எழுத்துரிமை உள்ளிட்ட ஜனநாயக உரிமைகள் பாதுகாக்கப்பட வேண்டும் என்றும் தொழிற்சங்கங்கள் உறுதி ஏற்றுக்கொண்டன. நிகழ்ச்சியில் ஏஐடியுசி மாவட்டத் தலைவர் வெ. சேவையா, மாவட்டச் செயலாளர் துரை. மதிவாணன், சிஐடியு மாவட்ட துணைச் செயலாளர் கே. அன்பு உள்ளிட்ட பல்வேறு தொழிற்சங்க நிர்வாகிகள் கலந்து கொண்டனர்.