விருதுநகரில் இருந்து மல்லாங்கிணறு செல்லும் சாலையில், சாலை விரிவாக்கப் பணிகளுக்காக நெடுஞ்சாலைத் துறை மற்றும் நகராட்சி ஊழியர்கள் இணைந்து ஆக்கிரமிப்புகளை அகற்றும் பணியில் ஈடுபட்டனர்.
இந்த சாலை விரிவாக்கப் பணிகளுக்காக, அப்பகுதியில் உள்ள கடைகளைக் காலி செய்யுமாறு கடந்த 15 நாட்களுக்கு முன்பு நெடுஞ்சாலைத் துறை சார்பில் கடை உரிமையாளர்களுக்கு சுற்றறிக்கை அனுப்பப்பட்டதாகக் கூறப்படுகிறது. இதன் அடிப்படையில் ஒரு சில கடைகள் ஏற்கனவே காலி செய்யப்பட்டன.
இந்நிலையில், காலி செய்யப்படாமல் இருந்த மீதமுள்ள கடைகளை அகற்றும் பணியில் அதிகாரிகள் ஈடுபட்டனர். காவல்துறையினரின் பாதுகாப்புடன் நகராட்சி ஊழியர்களின் உதவியோடு சாலையின் இருபுறமும் இருந்த ஆக்கிரமிப்பு கடைகள் அகற்றப்பட்டன. இதற்கிடையே, சில கடைக்காரர்கள் எதிர்ப்பு தெரிவித்ததை அடுத்து, அவர்களுக்கு மட்டும் உரிய கால அவகாசம் வழங்கப்பட்டதாக அதிகாரிகள் தெரிவித்தனர்.