உலக இதய தினத்தை முன்னிட்டு, காவேரி மருத்துவமனை சார்பில் நடைபெற்ற 5-வது காவேரி மாரத்தான் போட்டியில் அனைத்து வயதினரும் திரளாக கலந்துகொண்டனர்.
இந்தியாவின் முன்னணி பல்நோக்கு மருத்துவமனைகளில் ஒன்றான காவேரி மருத்துவமனை சார்பில், 5-வது காவேரி மாரத்தான் போட்டி திருநெல்வேலி பாளையங்கோட்டை ஏஞ்சலோ மெட்ரிகுலேஷன் மேல்நிலைப் பள்ளியில் அக்டோபர் 4, 2026 அன்று சிறப்பாக நடைபெற்றது. உலக இதய தினத்தை (செப்டம்பர் 29) முன்னிட்டு இதய ஆரோக்கியம் மற்றும் சுறுசுறுப்பான வாழ்க்கை முறையின் அவசியம் குறித்த விழிப்புணர்வை ஏற்படுத்துவதற்காக இந்த ஓட்டப்பந்தயம் நடத்தப்பட்டது.
இந்தப் போட்டியில் அனைத்து வயதுடைய 3,900-க்கும் மேற்பட்டோர் உற்சாகமாகப் பங்கேற்றனர். 10 கி.மீ. மற்றும் 5 கி.மீ. என இரண்டு பிரிவுகளில் நடைபெற்ற இந்தப் போட்டியின் வெற்றியாளர்களுக்கு மொத்தம் ரூ.1,25,000 பரிசுத்தொகை வழங்கப்பட்டது.
போட்டி விவரங்கள்:
- 10 கி.மீ. ஓட்டம் காலை 6:00 மணிக்குத் தொடங்கியது. இதனை நெல்லை மாநகரக் காவல்துறை ஆணையர் திரு. தேஷ்முக் சேகர் சஞ்சய், ஐ.பி.எஸ். கொடியசைத்துத் தொடங்கிவைத்தார்.
- 5 கி.மீ. ஓட்டம் காலை 6:15 மணிக்குத் தொடங்கியது. இதனை திருநெல்வேலி மாவட்ட ஆட்சியர் திரு. ஆனந்த் மோகன், ஐ.ஏ.எஸ். கொடியசைத்துத் தொடங்கிவைத்தார்.
- போட்டிகளின் தொடக்க மற்றும் நிறைவு இடமாகப் பாளையங்கோட்டை ஏஞ்சலோ மெட்ரிகுலேஷன் பள்ளி வளாகம் அமைந்தது.
நிகழ்ச்சியில் காவேரி மருத்துவமனையின் மூத்த இருதய நோய் நிபுணர் டாக்டர் எம்.எஸ். மஹ்பூபு சுபுஹானி மற்றும் ஆலோசகர் இதய மற்றும் நெஞ்சக அறுவை சிகிச்சை நிபுணர் டாக்டர் அருண் சிங் ஆகியோர் இதய நோய் அபாயத்தைக் குறைப்பதிலும், உடற்பயிற்சியின் அவசியத்தையும் குறித்து விளக்கமளித்தனர்.
வெற்றி பெற்றவர்களுக்கு டாக்டர் பி. ஆவுடையப்பன் மற்றும் பொறியாளர் என். வெங்கடேஷ்மணி ஆகியோர் பரிசுகளை வழங்கினர். காவேரி மருத்துவமனையின் பொது மேலாளர் (செயல்பாடுகள்) திரு. பி. வைரமுத்து நிறைவு உரையாற்றினார்.