விருதுநகர் மாவட்டம் ஸ்ரீவில்லிபுத்தூர் அருகே செண்பகத்தோப்பு வனப்பகுதியில் பெய்த கனமழையால் பேயனாற்று ஓடையில் திடீரென காட்டாற்று வெள்ளம் ஏற்பட்டது. இதையடுத்து பேயனாற்று பகுதிக்கு பொதுமக்கள் செல்ல வேண்டாம் என வனத்துறையினர் அறிவுறுத்தியுள்ளனர்.
ஸ்ரீவில்லிபுத்தூர் மேற்கு தொடர்ச்சி மலைப்பகுதியில் இன்று மாலை பலத்த காற்றுடன் கனமழை பெய்தது. தொடர்ந்து பெய்த கனமழையின் காரணமாக செண்பகத்தோப்பு வனப்பகுதியில் உள்ள பேயனாற்று ஓடையில் நீர்வரத்து அதிகரித்து காட்டாற்று வெள்ளம் ஏற்பட்டது.
திடீரென ஏற்பட்ட காட்டாற்று வெள்ளத்தால் அப்பகுதிக்கு சென்றிருந்த பொதுமக்கள் அச்சமடைந்தனர். மலைப்பகுதியில் தொடர்ந்து மழை பெய்து வருவதால் பேயனாற்றில் நீர்வரத்து மேலும் அதிகரிக்க வாய்ப்புள்ளதாக தெரிவிக்கப்பட்டுள்ளது.
இதையடுத்து முன்னெச்சரிக்கை நடவடிக்கையாக பேயனாற்று மற்றும் அதனைச் சுற்றியுள்ள பகுதிகளுக்கு பொதுமக்கள் செல்ல வேண்டாம் என வனத்துறையினர் அறிவுறுத்தியுள்ளனர். மழைக்காலங்களில் காட்டுப்பகுதிகளில் ஏற்படும் திடீர் நீர்வரத்தை கருத்தில் கொண்டு பொதுமக்கள் பாதுகாப்புடன் இருக்குமாறும் அறிவுறுத்தப்பட்டுள்ளது.