சர்வதேச உலக அமைதி தினத்தை முன்னிட்டு தேனியில் உலக அமைதியை வலியுறுத்தி விழிப்புணர்வு பேரணி நடைபெற்றது. இதில் பள்ளி, கல்லூரி மாணவர்கள், பொதுமக்கள் மற்றும் சமூக ஆர்வலர்கள் என ஏராளமானோர் கலந்து கொண்டனர்.
தேனி புதிய பேருந்து நிலையத்தில் இருந்து தொடங்கிய இந்த விழிப்புணர்வு பேரணியை தேனி ஏ.டி.எஸ்.பி. மகேஷ் கொடியசைத்து தொடங்கி வைத்தார்.
பேரணியில் பங்கேற்றவர்கள் உலக அமைதியை வலியுறுத்தும் பதாகைகளை ஏந்தியபடி ஊர்வலமாக சென்றனர். குறிப்பாக, “போரை நிறுத்து”, “ஆதரவற்ற குழந்தைகளை உருவாக்காதே” உள்ளிட்ட வாசகங்கள் இடம்பெற்ற பதாகைகளை அவர்கள் கையில் ஏந்தியிருந்தனர்.
தேனி புதிய பேருந்து நிலையத்தில் இருந்து புறப்பட்ட பேரணி என்.ஆர்.டி. சாலை, பெரியகுளம் சாலை வழியாக சென்று பழைய பேருந்து நிலையத்தை அடைந்தது.
பேரணியின் நிறைவாக பழைய பேருந்து நிலையத்தில் உலக அமைதியை வலியுறுத்தி பங்கேற்பாளர்கள் உறுதிமொழி எடுத்துக்கொண்டனர். உலகம் முழுவதும் அமைதி நிலவ வேண்டும் என்பதை வலியுறுத்தி நடைபெற்ற இந்த விழிப்புணர்வு நிகழ்ச்சியில் ஏராளமானோர் பங்கேற்றனர்.