சிவகங்கை அரண்மனை வாசல் முன்பு பல்வேறு கோரிக்கைகளை வலியுறுத்தி அனைத்து துறை தொழிலாளர் முன்னேற்றச் சங்கப் பேரவை (தொமுச) சார்பில் கண்டன ஆர்ப்பாட்டம் நடைபெற்றது. இதில் 200-க்கும் மேற்பட்ட தொழிற்சங்க நிர்வாகிகள் மற்றும் தொழிலாளர்கள் பங்கேற்றனர்.
மின்வாரிய மாவட்ட தொமுச கவுன்சில் பேரவைத் தலைவர் முருகேசன் தலைமையில் நடைபெற்ற ஆர்ப்பாட்டத்தில், மாவட்ட தொமுச செயலாளர் திருநாவுக்கரசு வரவேற்புரையாற்றினார். பொருளாளர் வடிவேல் முன்னிலை வகித்தார்.
தொமுச மாநில அமைப்புச் செயலாளர் எஸ்.தர்மன் சிறப்பு அழைப்பாளராக கலந்து கொண்டு பேசினார். அப்போது, தொழிலாளர்கள் மற்றும் விவசாயிகளின் நலன்களை பாதிக்கும் வகையில் அரசுகளின் நடவடிக்கைகள் இருப்பதாக அவர் குற்றம்சாட்டினார். மேலும், தங்களது கோரிக்கைகளை வலியுறுத்தி பேசினார்.
ஆர்ப்பாட்டத்தில், விலைவாசி உயர்வை கட்டுப்படுத்த வேண்டும், மத்திய அரசின் நான்கு தொழிலாளர் சட்டத் தொகுப்புகளை தமிழ்நாட்டில் அமல்படுத்தக் கூடாது என்றும், இதுதொடர்பாக சட்டப்பேரவையில் தீர்மானம் நிறைவேற்ற வேண்டும் என்றும் வலியுறுத்தப்பட்டது. நான்கு தொழிலாளர் சட்டத் தொகுப்புகள் குறித்து மத்திய அரசு தொழிலாளர் நலனை வலுப்படுத்தும் சீர்திருத்தங்கள் என விளக்கி வருகிறது.
மேலும், தூத்துக்குடியில் தனியார் அனல்மின் நிலையம் அமைக்கும் திட்டத்தை கைவிட வேண்டும், போக்குவரத்து, டாஸ்மாக் மற்றும் மின்சாரத் துறைகளை தனியார்மயமாக்கக் கூடாது, 108 அவசர ஊர்தி சேவையை அரசே நடத்த வேண்டும், தடையில்லா மின்சாரம் வழங்க வேண்டும் உள்ளிட்ட கோரிக்கைகளையும் போராட்டக்காரர்கள் முன்வைத்தனர்.
ஆர்ப்பாட்டத்தில் தமிழ்நாடு 108 அவசர ஊர்தி தொழிலாளர் முன்னேற்ற சங்கத்தின் சிவகங்கை மாவட்ட நிர்வாகிகள் மற்றும் உறுப்பினர்கள், தமிழ்நாடு கனிம நிறுவனம் தொமுச நிர்வாகிகள், பாம்கோ உள்ளிட்ட பல்வேறு துறைகளைச் சேர்ந்த தொமுச நிர்வாகிகள் மற்றும் தொழிலாளர்கள் கலந்து கொண்டனர்.
இந்த ஆர்ப்பாட்டத்தில் மாநில துணைப் பொதுச்செயலாளர் மணிகண்டபிரபு, மதுரை மண்டல செயலாளர் மற்றும் சிவகங்கை மாவட்டத் தலைவர் மணிமாறன், மாவட்டச் செயலாளர் சுரேஷ், மாவட்ட பொருளாளர் பாலமுருகன், மாவட்ட துணைத் தலைவர் ராஜதுரை உள்ளிட்டோர் பங்கேற்றனர்.