விருதுநகர் மாவட்ட விளையாட்டரங்கில் நடைபெற்று வரும் முதலமைச்சர் கோப்பை விளையாட்டுப் போட்டிகளை விருதுநகர் நாடாளுமன்ற உறுப்பினர் மாணிக்கம் தாகூர் மற்றும் காங்கிரஸ் கிழக்கு மாவட்டத் தலைவர் கிருஷ்ணமூர்த்தி உள்ளிட்ட கட்சி நிர்வாகிகள் பார்வையிட்டனர்.
தொடர்ந்து மாவட்ட ஆட்சியர் அலுவலக வளாகத்தில் உள்ள நாடாளுமன்ற உறுப்பினர் அலுவலகத்தில் மாணிக்கம் தாகூர் எம்.பி. செய்தியாளர்களை சந்தித்தார்.
அப்போது அவர் கூறுகையில், தந்தை பெரியாரின் பிறந்தநாளான செப்டம்பர் 17-ம் தேதி முதல் சமூகநீதி மற்றும் தமிழகத்தின் 69% இடஒதுக்கீட்டை பாதுகாக்கும் பிரச்சார இயக்கம் தமிழ்நாடு காங்கிரஸ் கமிட்டி சார்பில் தொடங்கப்பட உள்ளதாக தெரிவித்தார்.
“ஜாதிவாரி கணக்கெடுப்பு குறித்த உண்மை மக்களிடம் கொண்டு செல்லப்படும்”
ஜாதிவாரி கணக்கெடுப்பு விவகாரத்தில் மத்திய பாஜக அரசு மேற்கொண்டு வரும் நடவடிக்கைகளை மக்களிடம் எடுத்துச் செல்லவும், அதன் காரணமாக 69% இடஒதுக்கீட்டுக்கு உருவாகக்கூடிய ஆபத்தை தடுக்கவும் இந்த பிரச்சார இயக்கம் நடத்தப்படுவதாக மாணிக்கம் தாகூர் கூறினார்.
தமிழ்நாடு காங்கிரஸ் கமிட்டியின் ஓபிசி பிரிவு சார்பில் செப்டம்பர் 17-ம் தேதி மாலை 4 மணிக்கு சென்னை சத்தியமூர்த்தி பவனில் பிரச்சார இயக்கம் தொடங்கப்பட உள்ளதாகவும், திராவிடர் கழகத் தலைவர் கி.வீரமணி இதனை தொடங்கி வைக்க உள்ளதாகவும் தெரிவித்தார்.
அகில இந்திய காங்கிரஸ் கமிட்டி பொதுச்செயலாளர் குலாம் அகமது மீர், செயலாளர் நவீன் தீத் ஆல்வா உள்ளிட்டோர் நிகழ்ச்சியில் பங்கேற்க உள்ளதாகவும் அவர் கூறினார்.
ராகுல் காந்தி தொடர்ந்து ஜாதிவாரி கணக்கெடுப்பை வலியுறுத்தி வருவதாகவும், ஓபிசி மற்றும் ஆதிதிராவிட சமூகங்களின் எண்ணிக்கை, அவர்களின் கல்வி, வேலைவாய்ப்பு மற்றும் வாழ்வாதார நிலை குறித்து நம்பகமான தரவுகள் கிடைப்பது சமூகநீதிக்கு அவசியம் என்றும் மாணிக்கம் தாகூர் தெரிவித்தார்.
தமிழகம் முழுவதும் பிரச்சாரக் கூட்டங்கள்
மத்திய அரசின் நடவடிக்கைகளை கண்டித்து தமிழகம் முழுவதும் காங்கிரஸ் சார்பில் பிரச்சாரக் கூட்டங்கள் நடத்தப்பட உள்ளதாக அவர் தெரிவித்தார்.
நவம்பர் 1-ம் தேதி ஈரோட்டில் நடைபெறும் நிறைவு விழாவில் மாணிக்கம் தாகூர் எம்.பி., ஏஐசிசி பொதுச்செயலாளர் குலாம் அகமது மீர் மற்றும் விஜயசந்தன் உள்ளிட்டோர் பங்கேற்க உள்ளதாகவும் கூறினார்.
முதற்கட்ட பிரச்சாரம் நவம்பர் மாதத்தில் நிறைவடைந்த பின்னர், மழைக்காலத்திற்குப் பிறகு 2027 ஜனவரி மாதத்தில் ராகுல் காந்தியை தமிழகத்திற்கு அழைத்து வந்து, அனைத்துக் கட்சிகளையும் ஒருங்கிணைத்து பிரம்மாண்ட சமூகநீதி மாநாடு நடத்த திட்டமிடப்பட்டுள்ளதாகவும் அவர் தெரிவித்தார்.
“தவெக வேட்பாளரின் வெற்றிக்கு காங்கிரஸ் பணியாற்றும்”
தமிழகத்தில் தவெக தலைமையில் நேர்மையான, லஞ்சமற்ற ஆட்சி நடைபெற்று வருவதாக மாணிக்கம் தாகூர் தெரிவித்தார்.
இந்த ஆட்சிக்கு ஆதரவளிக்கும் இடதுசாரி கட்சிகள், இடைத்தேர்தலில் தனித்துப் போட்டியிட முடிவு செய்திருப்பது ஆச்சரியமளித்தாலும், அந்த முடிவை ஏற்றுக்கொள்ள வேண்டும் என்றும் அவர் கூறினார்.
வரவிருக்கும் இடைத்தேர்தலில் தவெக வேட்பாளரின் வெற்றிக்காக காங்கிரஸ் கட்சியினர் தீவிரமாக பணியாற்றுவார்கள் என்றும் மாணிக்கம் தாகூர் தெரிவித்தார்.
பட்டினப்பாக்கம் தலைமைச் செயலகம் குறித்து
சென்னை பட்டினப்பாக்கம் பகுதியில் ரூ.1,200 கோடி மதிப்பில் 20 லட்சம் சதுர அடி பரப்பளவில் நவீன தலைமைச் செயலகம் அமைக்க தமிழக அரசு நடவடிக்கை எடுத்து வருவதாக கூறிய அவர், இதுகுறித்து மீனவ மக்களிடம் ஏற்பட்டுள்ள அச்சத்தை அரசு போக்க வேண்டும் என்றார்.
முதலமைச்சர் லண்டன் பயணத்திலிருந்து திரும்பிய பின்னர் மீனவ மக்களுடன் பேச்சுவார்த்தை நடத்தி சுமுகமான முடிவு காண்பார் என நம்புவதாகவும் அவர் தெரிவித்தார்.
இயற்கை வளங்கள் குறித்தும் கருத்து
தமிழகத்தில் ஆற்றுப்படுகைகள் பாதுகாக்கப்பட்ட மண்டலங்களாக மாற்றப்பட்டுள்ளதாக தெரிவித்த மாணிக்கம் தாகூர், இயற்கை வளங்களை பாதுகாப்பதற்காக சட்டமன்ற முடிவுகளின் அடிப்படையில் நடவடிக்கைகள் மேற்கொள்ளப்பட்டு வருவதாக கூறினார்.
நாகப்பட்டினத்தில் இருந்து எண்ணெய் எடுக்கும் தொழிற்சாலையின் விரிவாக்கம் ஆந்திராவுக்கு செல்வது தொடர்பாகவும் அவர் கருத்து தெரிவித்தார். தமிழகத்தில் இயற்கை வளங்களை பாதுகாக்கும் நடைமுறைகள் இருப்பதால், அனைத்து தொழிற்சாலைகளும் ஆந்திராவுக்கு செல்கின்றன என பொதுவாக கூற முடியாது என்றும் அவர் தெரிவித்தார்.
மேலும், அரசு பேருந்துகளின் வண்ண மாற்றத்தை மட்டும் பார்க்காமல், பேருந்துகளுக்குள் செய்யப்பட்டுள்ள வசதிகள் மற்றும் மேம்பாடுகளையும் மக்கள் கவனிக்க வேண்டும் என்றும் மாணிக்கம் தாகூர் கூறினார்.