விருதுநகர் மாவட்டம் திருச்சுழி நகர்ப் பகுதியில் பொதுமக்களை அச்சுறுத்தும் வகையில் கையில் ஆயுதத்துடன் சுற்றித் திரிந்த இளைஞரை காவல்துறையினர் கைது செய்துள்ளனர்.
திருச்சுழி அரசு மருத்துவமனை செல்லும் சாலையில், திருச்சுழி காவல் நிலையக் காவல்துறையினர் வழக்கமான ரோந்துப் பணியில் ஈடுபட்டிருந்தனர். அப்போது, அந்த வழியாக இருசக்கர வாகனத்தில் வந்த திருச்சுழி பச்சரியைச் சேர்ந்த தினேஷ்குமார் (35) என்பவரை காவல்துறையினர் தடுத்து நிறுத்தி விசாரித்தனர். விசாரணையின் போது அவர் முன்னுக்குப் பின் முரணாகப் பதிலளித்ததாகக் கூறப்படுகிறது.
இதனைத் தொடர்ந்து, அவரது வாகனத்தில் காவல்துறையினர் நடத்திய சோதனையில், அவர் வைத்திருந்த அரிவாள் உள்ளிட்ட ஆயுதம் கண்டுபிடிக்கப்பட்டது. பொதுமக்களுக்கு அச்சுறுத்தல் ஏற்படுத்தும் வகையில் ஆயுதத்துடன் நடமாடிய தினேஷ்குமாரை காவல்துறையினர் உடனடியாகக் கைது செய்து காவல் நிலையத்திற்கு அழைத்துச் சென்றனர்.
கைது செய்யப்பட்ட தினேஷ்குமார் மீது ஆயுதத் தடைச் சட்டத்தின் கீழ் வழக்குப்பதிவு செய்யப்பட்டது. பின்னர், அவரை மருத்துவ பரிசோதனைக்கு உட்படுத்தி நீதிமன்றத்தில் ஆஜர்படுத்திய காவல்துறையினர், சட்டப்பூர்வ நடவடிக்கையாகச் சிறையில் அடைத்தனர்.