திருநெல்வேலி மாநகராட்சிக்கு உட்பட்ட பாளையங்கோட்டை மண்டல அலுவலக வளாகத்திற்குள் பாதாள சாக்கடை கழிவுநீர் பெருக்கெடுத்து ஓடியதால், அங்கு பணிபுரியும் ஊழியர்களும், அலுவலகத்திற்கு வருகை தந்த பொதுமக்களும் கடும் அவதிக்குள்ளாகினர்.
பாளையங்கோட்டை தெற்கு பஜார் பகுதியில் பாதாள சாக்கடையில் அடிக்கடி அடைப்பு ஏற்பட்டு கழிவுநீர் வெளியேறுவது வாடிக்கையான நிகழ்வாக மாறி உள்ளது. இந்த அடைப்பைச் சரி செய்ய வாரத்தில் நான்கு நாட்கள் வாகனங்களை நிறுத்தி பணிகள் மேற்கொள்ளப்பட்டு வருகின்றன. இந்நிலையில், கடந்த இரண்டு நாட்களாகப் பெய்த மழை மற்றும் பாதாள சாக்கடை அடைப்பு காரணமாக, பாளையங்கோட்டை மண்டல அலுவலகத்தின் பின்புறம் உள்ள சாக்கடையில் இருந்து கழிவுநீர் வெளியேறி அலுவலக வளாகத்திற்குள் புகுந்துள்ளது.
அலுவலக வளாகத்திற்குள் கழிவுநீர் ஆறாக ஓடித் தேங்கியதால் அப்பகுதியில் சுகாதாரம் கடுமையாகப் பாதிக்கப்பட்டுள்ளது. கடுமையான துர்நாற்றம் வீசியதன் காரணமாகப் பணிக்கு வந்த ஊழியர்கள் மற்றும் அலுவலகப் பணிகளுக்காக வந்த பொதுமக்கள் பெரும் சிரமத்திற்கு ஆளாகினர். தெற்கு பஜார் பகுதியில் உள்ள பாதாள சாக்கடை அடைப்பைச் சரி செய்தால் மட்டுமே அலுவலக வளாகத்திற்குள் தேங்கியுள்ள கழிவுநீரின் வெளியேற்றத்தைத் தடுத்து நிறுத்த முடியும்.
எனினும், அப்பகுதியில் போக்குவரத்து தடை செய்யப்பட்டால் மட்டுமே அதற்கான சீரமைப்புப் பணிகளை மேற்கொள்ள முடியும் என்பதால், உடனடி நடவடிக்கைகளை எடுப்பதில் தாமதம் ஏற்பட்டுள்ளதாகத் தெரிகிறது. சுகாதாரத்தைப் பேண வேண்டிய மாநகராட்சி அலுவலகத்திலேயே இத்தகைய சுகாதாரக் கேடு ஏற்பட்டுள்ளது பொதுமக்களிடையே அதிர்ச்சியை ஏற்படுத்தியுள்ளது.
தற்போது மழைக்காலம் தொடங்கியுள்ள நிலையில், அலுவலக வளாகத்தில் கழிவுநீர் தேங்கி நிற்பது கொசு உற்பவிப்பதற்கும், நோய்த்தொற்றுகள் பரவுவதற்கும் வழிவகுக்கும் என்பதால், உடனடியாகக் கழிவுநீர் வெளியேறுவதைத் தடுத்து நிரந்தரத் தீர்வு காண வேண்டும் எனப் பொதுமக்கள் கோரிக்கை விடுத்துள்ளனர். வீடுகளில் கழிவுநீர் தேங்கக் கூடாது என்று பொதுமக்களை அறிவுறுத்தும் மாநகராட்சி நிர்வாகம், அந்த விதிமுறைகளைத் தங்கள் அலுவலக வளாகத்திலும் முறையாகப் பின்பற்ற வேண்டும் என்பதே அனைவரின் எதிர்பார்ப்பாக உள்ளது.