விருதுநகர் மாவட்டம் சாத்தூரில் உள்ள ஒரிஜினல் இயந்திர தீப்பெட்டி தொழிற்சாலையில் இன்று திடீரென தீ விபத்து ஏற்பட்டது. இந்த விபத்தில் இயந்திரங்கள் மற்றும் உற்பத்திப் பொருட்கள் உள்ளிட்ட பல்வேறு பொருட்கள் தீயில் கருகி சேதமடைந்தன. அதிர்ஷ்டவசமாக தொழிலாளர்கள் யாருக்கும் காயம் ஏற்படவில்லை.
இந்த தொழிற்சாலையில் இயந்திரங்களைப் பயன்படுத்தி தீப்பெட்டிகள் தயாரிக்கப்பட்டு வருகின்றன. வழக்கம்போல் தொழிலாளர்கள் பணியில் ஈடுபட்டிருந்தபோது, திடீரென தீப்பொறி ஏற்பட்டு தீ பரவியதாக கூறப்படுகிறது.
சிறிது நேரத்தில் தீ வேகமாக பரவி, தொழிற்சாலையில் இருந்த இயந்திரங்கள், உற்பத்திக்கான மூலப்பொருட்கள் மற்றும் தயாரிக்கப்பட்ட தீப்பெட்டிகள் உள்ளிட்டவற்றில் பற்றியது. இதனால் தொழிற்சாலை முழுவதும் புகை சூழ்ந்தது.
தீ விபத்து குறித்து தகவல் அறிந்ததும் சாத்தூர் தீயணைப்பு மற்றும் மீட்புத்துறையினர் சம்பவ இடத்திற்கு விரைந்து வந்து தீயை அணைக்கும் பணியில் ஈடுபட்டனர். தொழிற்சாலை முழுவதும் புகை சூழ்ந்திருந்ததால் தீயை கட்டுப்படுத்துவதில் சிரமம் ஏற்பட்டது.
எனினும், தீயணைப்பு வீரர்கள் ஒரு மணி நேரத்திற்கும் மேலாக போராடி தீயை கட்டுக்குள் கொண்டு வந்தனர்.
இந்த தீ விபத்தில் பல்வேறு இயந்திரங்கள், மூலப்பொருட்கள் மற்றும் தயாரிக்கப்பட்ட பொருட்கள் தீயில் கருகி சேதமடைந்தன. சுமார் ரூ.3 லட்சத்துக்கும் மேல் மதிப்பிலான பொருட்கள் சேதமடைந்திருக்கலாம் என கூறப்படுகிறது.
தீ விபத்து ஏற்பட்டதும் தொழிலாளர்கள் உடனடியாக தொழிற்சாலையில் இருந்து வெளியேறியதால், அதிர்ஷ்டவசமாக யாருக்கும் காயமோ, உயிர்ச்சேதமோ ஏற்படவில்லை.
இதுகுறித்து சாத்தூர் நகர் காவல்துறையினர் வழக்குப்பதிவு செய்து, தீ விபத்துக்கான காரணம் குறித்து விசாரணை நடத்தி வருகின்றனர்.