திருநெல்வேலி வண்ணாரப்பேட்டையில் உள்ள வாசன் கண் மருத்துவமனையில் தமிழ்நாடு வல்கனைசிங் பழுது பார்க்கும் உரிமையாளர்கள் மற்றும் தொழிலாளர்கள் நலச் சங்கம் சார்பில் ஆலோசனைக் கூட்டம் மற்றும் இலவச கண் சிகிச்சை முகாம் நடைபெற்றது.
கூட்டத்தில் வல்கனைசிங் தொழிலாளர்களின் பாதுகாப்பு, தொழில் நலன் மற்றும் அவர்களது குடும்பங்களின் வாழ்வாதாரம் தொடர்பான பல்வேறு கோரிக்கைகள் குறித்து ஆலோசிக்கப்பட்டது.
டயர் வெடிப்பு விபத்துகளுக்கு பாதுகாப்பு கோரிக்கை
பஞ்சர் ஆன கார் உள்ளிட்ட வாகனங்களின் டயர்களை பழுது பார்க்கும் போது, எதிர்பாராத விதமாக டயர் வெடித்து தொழிலாளர்கள் உயிரிழப்பதும், கடுமையான காயங்களுக்கு உள்ளாவதும் ஏற்படுவதாக சங்க நிர்வாகிகள் தெரிவித்தனர்.
எனவே, வல்கனைசிங் தொழிலாளர்களுக்கென தனி நல வாரியம் அமைக்க வேண்டும் என்றும், பணியின்போது விபத்தில் சிக்கி பாதிக்கப்படும் தொழிலாளர்கள் மற்றும் உயிரிழக்கும் தொழிலாளர்களின் குடும்பங்களுக்கு உரிய நிவாரணம் மற்றும் இழப்பீடு வழங்கும் வகையில் நடவடிக்கை எடுக்க வேண்டும் என்றும் தமிழக அரசுக்கு கோரிக்கை விடுக்கப்பட்டது.
24 மணி நேர சேவைக்கு சுங்கக் கட்டண விலக்கு
வாகனங்கள் பழுதாகி சாலையில் நிற்கும் அவசர நேரங்களில் பொதுமக்களுக்கு உதவும் வகையில் 24 மணி நேரமும் செயல்படும் நடமாடும் பஞ்சர் சேவை வாகனங்களுக்கு சுங்கச்சாவடிகளில் கட்டண விலக்கு வழங்க வேண்டும் என்றும் வலியுறுத்தப்பட்டது.
மேலும், 108 ஆம்புலன்ஸ் சேவையைப் போன்று, அவசர நேரங்களில் பொதுமக்கள் வல்கனைசிங் தொழிலாளர்களை தொடர்புகொள்வதற்காக கட்டணமில்லா தொலைபேசி எண் ஒன்றை அரசு ஒதுக்க வேண்டும் என்றும் சங்கத்தினர் கோரிக்கை விடுத்தனர்.
3A பிரிவில் குறைந்த மின் கட்டணம் வழங்க கோரிக்கை
இரவு, பகல் என 24 மணி நேரமும் வல்கனைசிங் தொழில் நடைபெறும் நிறுவனங்களுக்கு தற்போது விதிக்கப்படும் வணிக மின் கட்டணத்தை குறைக்க வேண்டும் என்றும் கூட்டத்தில் வலியுறுத்தப்பட்டது.
வல்கனைசிங் தொழில் நிறுவனங்களை 3A மின் கட்டணப் பிரிவின் கீழ் கொண்டு வந்து குறைந்த கட்டணத்தில் மின்சாரம் வழங்க தமிழக அரசு நடவடிக்கை எடுக்க வேண்டும் என்று சங்க நிர்வாகிகள் கோரிக்கை விடுத்தனர்.
கூட்டத்தின் ஒரு பகுதியாக வல்கனைசிங் தொழிலாளர்கள் மற்றும் அவர்களது குடும்பத்தினருக்காக இலவச கண் பரிசோதனை மற்றும் சிகிச்சை முகாமும் நடைபெற்றது.