அரசு மற்றும் அரசு உதவி பெறும் பள்ளிகளில் 6 முதல் 8-ம் வகுப்பு வரை பயிலும் மாணவர்களுக்கும் காலை உணவு வழங்கும் வகையில் விரிவாக்கம் செய்யப்பட்டுள்ள பெருந்தலைவர் காமராஜர் காலை உணவு திட்டம் விருதுநகரில் இன்று தொடங்கி வைக்கப்பட்டது.
தமிழகத்தில் அரசு மற்றும் அரசு உதவி பெறும் பள்ளிகளில் 1 முதல் 5-ம் வகுப்பு வரை பயிலும் மாணவர்களுக்காக காலை உணவு திட்டம் ஏற்கனவே செயல்படுத்தப்பட்டு வந்தது. இந்நிலையில், மாணவர்களின் ஊட்டச்சத்து மற்றும் கல்வி நலனை கருத்தில் கொண்டு இத்திட்டம் தற்போது 6 முதல் 8-ம் வகுப்பு வரையிலான மாணவர்களுக்கும் விரிவுபடுத்தப்பட்டுள்ளது.
இந்த விரிவாக்கப்பட்ட திட்டத்தை சென்னையில் முதலமைச்சர் விஜய் தொடங்கி வைத்தார். இதன் தொடர்ச்சியாக, விருதுநகர் டி.வி.எஸ். நடுநிலைப் பள்ளியில் பெருந்தலைவர் காமராஜர் காலை உணவு திட்டத்தின் தொடக்க விழா நடைபெற்றது.
இதில் விருதுநகர் சட்டமன்ற உறுப்பினர் எஸ்.பி. செல்வம் கலந்து கொண்டு 6 முதல் 8-ம் வகுப்பு வரை பயிலும் மாணவர்களுக்கு காலை உணவு வழங்கி திட்டத்தை தொடங்கி வைத்தார்.
தொடர்ந்து மாணவர்களுடன் அமர்ந்து காலை உணவை உட்கொண்ட எஸ்.பி. செல்வம், அவர்களுடன் கலந்துரையாடினார். இதனால் பள்ளி வளாகத்தில் மாணவர்கள் மற்றும் ஆசிரியர்கள் மத்தியில் உற்சாகம் ஏற்பட்டது.
விரிவாக்கம் செய்யப்பட்டுள்ள இந்த காலை உணவு திட்டத்தின் மூலம் 6 முதல் 8-ம் வகுப்பு மாணவர்களும் பள்ளி நாட்களில் காலை உணவை பெறும் வாய்ப்பு ஏற்பட்டுள்ளது.