விருதுநகர் மாவட்டத்தில் சமூகப் பாதுகாப்புத் திட்டத்தின் கீழ் உதவித்தொகை பெறும் பயனாளிகள், தங்களது ஆதார் எண்ணை வங்கிக் கணக்குடன் இணைக்க வேண்டும் என மாவட்ட ஆட்சித்தலைவர் ஷரண்யா அறி தெரிவித்துள்ளார்.
இந்திய அரசின் அறிவுறுத்தலின்படி, செப்டம்பர் மாதம் முதல் சமூகப் பாதுகாப்புத் திட்ட உதவித்தொகை பயனாளிகளுக்கு ஆதார் அடிப்படையிலான பணப்பரிவர்த்தனை முறை அமல்படுத்தப்பட்டுள்ளது.
இதன்படி, இனி பயனாளிகளுக்கான நிதியுதவி அவர்களின் ஆதார் எண்ணுடன் இணைக்கப்பட்ட வங்கிக் கணக்கில் வரவு வைக்கப்படும். அனைத்து பயனாளிகளுக்கும் அரசு வழங்கும் நிதியுதவி தடையின்றி சென்றடைவதை உறுதி செய்யும் வகையில் தேவையான நடவடிக்கைகள் மேற்கொள்ளப்பட்டு வருகின்றன.
ஆதார் இணைக்காதவர்கள் வங்கியை அணுக வேண்டும்
வங்கிக் கணக்குடன் ஆதார் எண்ணை இதுவரை இணைக்காத பயனாளிகள், சம்பந்தப்பட்ட வங்கியை அணுகி ஆதார் இணைப்பை மேற்கொள்ள வேண்டும் என மாவட்ட ஆட்சித்தலைவர் கேட்டுக்கொண்டுள்ளார்.
ஆதார் இணைப்பு அல்லது உதவித்தொகை தொடர்பாக ஏதேனும் சந்தேகம் அல்லது உதவி தேவைப்படும் பயனாளிகள், விருதுநகர் மாவட்ட ஆட்சியரகத்தில் உள்ள தனி துணை ஆட்சியர் (சமூகப் பாதுகாப்புத் திட்டம்) அலுவலகத்தையும், ஒவ்வொரு வட்டாட்சியர் அலுவலகத்திலும் செயல்படும் தனி வட்டாட்சியர் (சமூகப் பாதுகாப்புத் திட்டம்) அலுவலகங்களில் உள்ள உதவி மையங்களையும் அணுகலாம்.
அங்கு பயனாளிகளுக்கு தேவையான வழிகாட்டுதலும் உதவியும் வழங்கப்படும்.
ஒவ்வொரு பயனாளிக்கும் அரசு வழங்கும் நிதியுதவி எவ்வித இடையூறும் இன்றி சீராக சென்றடைவதை உறுதி செய்வதில் அரசு உறுதியாக இருப்பதாக மாவட்ட ஆட்சித்தலைவர் ஷரண்யா அறி தெரிவித்துள்ளார்.