விருதுநகர் மாவட்டம் சிவகாசி மாநகராட்சிக்குட்பட்ட திருத்தங்கல் பகுதியின் 24 வார்டுகளில் கடந்த 4 மாதங்களாக குடிநீர் விநியோகம், கழிவுநீர் கால்வாய் தூர்வாருதல், சாலை சீரமைப்பு உள்ளிட்ட அடிப்படை வசதிகள் முறையாக செய்து தரப்படவில்லை எனக் குற்றம்சாட்டி மாமன்ற உறுப்பினர்கள் மாநகராட்சி ஆணையாளரிடம் வாக்குவாதத்தில் ஈடுபட்டனர்.
சிவகாசி மாநகராட்சியில் மொத்தம் 48 வார்டுகள் உள்ள நிலையில், திருத்தங்கல் பகுதியைச் சேர்ந்த 1 முதல் 24-வது வார்டுகள் தொடர்பாக மாமன்ற உறுப்பினர்கள் மாநகராட்சி ஆணையாளர் கண்ணனை நேரில் சந்தித்து தங்களது கோரிக்கைகளை தெரிவித்தனர். அப்போது, கடந்த 4 மாதங்களாக தங்களது வார்டுகளில் குடிநீர் விநியோகம், கழிவுநீர் கால்வாய்களை தூர்வாருதல், சாலைகளை சீரமைத்தல் உள்ளிட்ட அடிப்படை பணிகள் மேற்கொள்ளப்படவில்லை என அவர்கள் தெரிவித்தனர்.
மேலும், தங்களுக்கு எந்தவிதமான பணிகளையும் மேற்கொள்ள வேண்டாம் என உத்தரவிடப்பட்டுள்ளதாக மாநகராட்சி பொறியாளர் ஒருவர் தெரிவித்ததாகவும் மாமன்ற உறுப்பினர்கள் கூறினர். எந்த உத்தரவின் அடிப்படையில் பணிகள் நிறுத்தப்பட்டுள்ளன என்றும் அவர்கள் ஆணையாளரிடம் கேள்வி எழுப்பினர்.
சாலை மறியல் போராட்டம் நடத்துவோம் என எச்சரிக்கை
தங்களது வார்டுகளில் அடிப்படை வசதிகள் செய்து தரப்படாததால் பொதுமக்கள் தொடர்ந்து தங்களிடம் முறையிட்டு வருவதாக மாமன்ற உறுப்பினர்கள் தெரிவித்தனர்.
மேலும், அடிப்படை வசதிகளை செய்து தரக்கோரி பொதுமக்கள் சாலை மறியல் போராட்டத்தில் ஈடுபட தயாராக இருப்பதாகவும், அவர்களை தாங்கள் சமாதானப்படுத்தி வருவதாகவும் தெரிவித்தனர்.
இதேநிலை தொடர்ந்தால், பொதுமக்களின் கோரிக்கையை வலியுறுத்தி தாங்களே சாலை மறியல் போராட்டத்தில் ஈடுபட வேண்டிய நிலை ஏற்படும் என்றும் மாநகராட்சி ஆணையாளரிடம் மாமன்ற உறுப்பினர்கள் எச்சரிக்கை விடுத்தனர்.
இந்நிலையில், திருத்தங்கல் பகுதியின் 24 வார்டுகளிலும் நிலவும் அடிப்படை வசதிகள் தொடர்பான பிரச்சினைகளுக்கு மாநகராட்சி நிர்வாகம் விரைந்து தீர்வு காண வேண்டும் என அவர்கள் வலியுறுத்தியுள்ளனர்.