விருதுநகர் மாவட்டம் சாத்தூர் அருகே பிரசித்தி பெற்ற இருக்கன்குடி மாரியம்மன் கோவிலில், புரட்டாசி மாத பௌர்ணமியை முன்னிட்டு 108 திருவிளக்கு பூஜை நடைபெற்றது. இதில் பல்வேறு பகுதிகளைச் சேர்ந்த ஏராளமான பெண்கள் கலந்து கொண்டு விளக்கேற்றி அம்மனை வழிபட்டனர்.
இருக்கன்குடி மாரியம்மன் கோவில் தென் தமிழகத்தில் பிரசித்தி பெற்ற ஆன்மிகத் தலமாக விளங்கி வருகிறது. இக்கோவிலில் ஒவ்வொரு மாதமும் பௌர்ணமி தினத்தை முன்னிட்டு கோவில் நிர்வாகம் சார்பில் 108 திருவிளக்கு பூஜை நடத்தப்பட்டு வருகிறது.
அந்த வகையில், புரட்டாசி மாத பௌர்ணமியை முன்னிட்டு கோவிலில் உள்ள கொழு மண்டபத்தில் 108 திருவிளக்கு பூஜை நடைபெற்றது.
இதற்கு முன்னதாக பௌர்ணமியை முன்னிட்டு அம்மனுக்கு பால், பன்னீர், ஜவ்வாது, சந்தனம், திரவியம், விபூதி, இளநீர் உள்ளிட்ட 21 வகையான திரவியங்களால் சிறப்பு அபிஷேகம் நடைபெற்றது. தொடர்ந்து அம்மனுக்கு சிறப்பு அலங்காரம் செய்யப்பட்டு, சிறப்பு பூஜைகள் மற்றும் தீபாராதனை நடைபெற்றன.
108 திருவிளக்கு பூஜையில் சாத்தூர், ஸ்ரீவில்லிபுத்தூர், தென்காசி, தென்மலை, சங்கரன்கோவில் உள்ளிட்ட பல்வேறு பகுதிகளில் இருந்து ஏராளமான பெண்கள் கலந்து கொண்டனர். பெண்கள் விளக்கேற்றி அம்மனை வழிபட்டனர்.
விளக்கு பூஜையில் பங்கேற்ற பெண்களுக்கு கோவில் நிர்வாகம் சார்பில் சேலை, குங்குமச்சிமிழ், காமாட்சி விளக்கு மற்றும் பூஜை பொருட்கள் இலவசமாக வழங்கப்பட்டன.
விளக்கு பூஜையை கோவில் அறங்காவலர் குழுத் தலைவர் ராமமூர்த்தி பூசாரி விளக்கேற்றி தொடங்கி வைத்தார். பூஜையின்போது அம்மன் பாடல்கள் பாடப்பட்ட நிலையில், சில பெண்கள் பக்தி பரவசத்தில் ஆடியதாக தெரிவிக்கப்பட்டது.
பூஜை நிறைவடைந்ததைத் தொடர்ந்து பக்தர்களுக்கு பிரசாதம் வழங்கப்பட்டது. மேலும், கோவிலில் நடைபெற்ற 108 திருவிளக்கு பூஜை கோவில் இணையதளம் வழியாக நேரலையாக ஒளிபரப்பப்பட்டது.