சிவகங்கை அருகே கட்டுப்பாட்டை இழந்த லாரி சாலையின் நடுவில் உள்ள தடுப்புச்சுவரில் மோதி தலைகுப்புற கவிழ்ந்ததில், லாரியில் இருந்த டீசல் சாலையில் பெருமளவில் கசிந்தது. உடனடியாக சம்பவ இடத்துக்கு சென்ற தீயணைப்புத் துறையினர் நுரை தெளித்து பாதுகாப்பு நடவடிக்கைகளை மேற்கொண்டதால் பெரும் விபத்து தவிர்க்கப்பட்டது.
காரைக்காலில் இருந்து பொட்டாசியம் குளோரைடு ஏற்றிக்கொண்டு லாரி ஒன்று சிவகங்கை நோக்கி வந்து கொண்டிருந்தது. சிவகங்கை–மதுரை தேசிய நெடுஞ்சாலையில் ஏனாதி பகுதியில் உள்ள வளைவில் லாரி சென்றபோது, ஓட்டுநரின் கட்டுப்பாட்டை இழந்ததாக கூறப்படுகிறது.
இதையடுத்து லாரி சென்டர் மீடியன் தடுப்புச்சுவரில் மோதி தலைகுப்புற கவிழ்ந்தது. விபத்தின் தாக்கத்தில் லாரியின் டேங்கில் இருந்த டீசல் சாலையில் அதிகளவில் கசிந்து கொட்டியது.
இதுகுறித்து தகவல் அறிந்ததும் சிவகங்கை தீயணைப்புத் துறையின் உதவி மாவட்ட அலுவலர் ஜெயராணி தலைமையிலான தீயணைப்பு வீரர்கள் சம்பவ இடத்துக்கு விரைந்து சென்றனர்.
சாலையில் கொட்டிய டீசல் காரணமாக தீப்பற்றும் அபாயம் இருந்ததால், முன்னெச்சரிக்கை நடவடிக்கையாக தீயணைப்பு வீரர்கள் நுரை தெளித்து பாதுகாப்பு பணியில் ஈடுபட்டனர். தொடர்ந்து லாரியை அப்புறப்படுத்துதல் உள்ளிட்ட மீட்பு பணிகளும் மேற்கொள்ளப்பட்டன.
விபத்து காரணமாக சிவகங்கை–மதுரை தேசிய நெடுஞ்சாலையில் சிறிது நேரம் போக்குவரத்து பாதிக்கப்பட்டது. இதனால் ஏனாதி பகுதியில் பரபரப்பு ஏற்பட்டது.
இந்த விபத்தில் அதிர்ஷ்டவசமாக உயிரிழப்பு ஏதும் ஏற்படவில்லை. விபத்து குறித்து போலீசார் விசாரணை நடத்தி வருகின்றனர்.