நெல்லை மாநகரில் கடந்த சில நாட்களாக வெயிலின் தாக்கம் அதிகமாக காணப்பட்ட நிலையில், கடந்த இரண்டு நாட்களாக மாலை நேரங்களில் தொடர்ந்து மழை பெய்து வருவதால் வெப்பம் தணிந்து குளிர்ச்சியான வானிலை நிலவி வருகிறது.
நெல்லை மாநகரப் பகுதிகளான பாளையங்கோட்டை, சமாதானபுரம், வி.எம்.சத்திரம், தியாகராஜ நகர் உள்ளிட்ட பல்வேறு இடங்களில் இடியுடன் கூடிய கனமழை பெய்தது. சுமார் ஒரு மணி நேரத்திற்கும் மேலாக தொடர்ந்து பெய்த மழையால் சாலைகள் மற்றும் தாழ்வான பகுதிகளில் மழைநீர் தேங்கியது.
இதனால் சில பகுதிகளில் சாலைகளில் மழைநீர் வெள்ளம் போல் தேங்கியதால் வாகன ஓட்டிகள் மற்றும் பொதுமக்கள் சிரமத்திற்கு உள்ளாகினர்.
இதனிடையே, நெல்லை அருகே உள்ள சீவலப்பேரி மற்றும் சுற்றுவட்டார பகுதிகளில் திடீரென ஆலங்கட்டி மழை பெய்தது. சாலைகளில் ஆலங்கட்டிகள் சிதறி விழுந்ததால் அப்பகுதியில் பரபரப்பான சூழல் ஏற்பட்டது.
ஆலங்கட்டிகளை கண்ட சிறுவர்கள் மற்றும் பொதுமக்கள் ஆர்வத்துடன் அவற்றை கைகளில் எடுத்து பார்த்து மகிழ்ந்தனர். கனமழை மற்றும் ஆலங்கட்டி மழையால் நெல்லை சுற்றுவட்டாரப் பகுதிகளில் குளிர்ச்சியான சூழல் நிலவியது.