விருதுநகர் மாவட்டம் சிவகாசி அருகே உள்ள திருத்தங்கலில் அமைந்துள்ள எண்ணெய் கடையில் ஏற்பட்ட திடீர் தீ விபத்தில் சுமார் 2 டன் எண்ணெய் எரிந்து சேதமடைந்துள்ளது.
திருத்தங்கல் தேவர் சிலை செல்லும் சாலையில் நவமணி என்பவருக்கு சொந்தமான எண்ணெய் கடை செயல்பட்டு வருகிறது. நேற்று இரவு வழக்கம் போல் கடையை பூட்டிவிட்டு உரிமையாளர் சென்ற நிலையில், இன்று அதிகாலை இக்கடையில் தீ விபத்து ஏற்பட்டுள்ளது. தீ மளமளவெனப் பரவி கொழுந்துவிட்டு எரிந்ததை அடுத்து, அப்பகுதி மக்கள் தீயணைப்புத் துறைக்குத் தகவல் அளித்தனர்.
சம்பவ இடத்திற்கு விரைந்து சென்ற சிவகாசி தீயணைப்புத் துறையினர், நீண்ட நேரம் போராடி தீயை முழுமையாகக் கட்டுக்குள் கொண்டுவந்தனர். இதனால் அருகில் இருந்த பிற கடைகளுக்குத் தீ பரவுவது தடுக்கப்பட்டது.
இந்த விபத்தில் கடையில் இருப்பு வைக்கப்பட்டிருந்த சுமார் 2 டன் அளவிலான எண்ணெய் முற்றிலும் எரிந்து சாம்பலாகியது. முதற்கட்ட விசாரணையின் அடிப்படையில், மின்கசிவு காரணமாக இந்த தீ விபத்து ஏற்பட்டிருக்கலாம் என்று காவல்துறையினர் சந்தேகிக்கின்றனர். இதுகுறித்து காவல்துறையினர் தொடர்ந்து விசாரணை நடத்தி வருகின்றனர்.