சென்னையில் டெங்கு காய்ச்சல் பாதிப்பு தொடர்ந்து அதிகரித்து வருகிறது. நேற்று ஒரே நாளில் மட்டும் 72 பேருக்கு டெங்கு பாதிப்பு உறுதி செய்யப்பட்டுள்ளதாக சுகாதாரத்துறை மற்றும் சென்னை மாநகராட்சி புள்ளிவிவரங்கள் தெரிவிக்கின்றன.
ஒரு மாதத்தில் இருமடங்கான பாதிப்பு
சென்னையில் கடந்த ஆகஸ்ட் மாதத்தில் 605 பேருக்கு டெங்கு பாதிப்பு கண்டறியப்பட்ட நிலையில், செப்டம்பர் மாதத்தில் இந்த எண்ணிக்கை 1,290 ஆக உயர்ந்துள்ளது. இதன் மூலம் ஒரே மாதத்தில் டெங்கு பாதிப்பு இருமடங்காக அதிகரித்துள்ளது.
தமிழகம் முழுவதும் நடப்பாண்டில் இதுவரை சுமார் 18,000 பேர் டெங்கு காய்ச்சலால் பாதிக்கப்பட்டுள்ளதாக தெரிவிக்கப்பட்டுள்ளது.
மருத்துவர்கள் அறிவுறுத்தல்
சளி, இருமல் போன்ற அறிகுறிகள் இல்லாமல் கடுமையான காய்ச்சல் மற்றும் உடல் வலி ஏற்பட்டால் டெங்கு பாதிப்பாக இருக்க வாய்ப்புள்ளதாக மருத்துவர்கள் எச்சரித்துள்ளனர்.
சென்னையில் பதிவாகும் டெங்கு நோயாளிகளில் பெரும்பாலானோர் சாதாரண காய்ச்சல் பாதிப்புடன் வீடுகளில் ஓய்வு மற்றும் மருத்துவர் ஆலோசனையுடன் குணமடைவதாகவும், ஒரு பகுதியினருக்கு மட்டும் மருத்துவமனையில் கண்காணிப்பு தேவைப்படுவதாகவும் தெரிவிக்கப்பட்டுள்ளது.
கொசு ஒழிப்பு பணிகள் தீவிரம்
டெங்கு பாதிப்பு அதிகரித்துள்ள நிலையில், சென்னை மாநகராட்சி சார்பில் கொசு ஒழிப்பு மற்றும் தடுப்பு நடவடிக்கைகள் தீவிரப்படுத்தப்பட்டுள்ளன.
சென்னையின் 15 மண்டலங்களிலும் 3,500-க்கும் மேற்பட்ட களப்பணியாளர்கள் வீடு வீடாகச் சென்று கொசுப்புழு ஒழிப்பு பணியில் ஈடுபட்டு வருகின்றனர். கூவம், அடையாறு உள்ளிட்ட நீர்நிலைகளிலும் கொசுக்களை கட்டுப்படுத்தும் பணிகள் மேற்கொள்ளப்பட்டு வருகின்றன.
பொதுமக்களுக்கு வேண்டுகோள்
வீடுகள், மொட்டை மாடிகள் மற்றும் சுற்றுப்புறங்களில் டயர்கள், உடைந்த குடங்கள் உள்ளிட்ட பொருட்களில் தண்ணீர் தேங்காமல் பார்த்துக்கொள்ளுமாறு அறிவுறுத்தப்பட்டுள்ளது.
காய்ச்சல் ஏற்பட்டால் சுயமாக மருந்துகளை உட்கொள்வதைத் தவிர்த்து, அருகிலுள்ள அரசு மருத்துவமனை அல்லது நகர்ப்புற ஆரம்ப சுகாதார நிலையத்தை அணுகுமாறு சுகாதாரத்துறை கேட்டுக்கொண்டுள்ளது.