விலைவாசி உயர்வை உடனடியாக கட்டுப்படுத்த வேண்டும், பொதுத்துறை நிறுவனங்களின் பங்குகளை விற்பதை நிறுத்த வேண்டும், தூத்துக்குடியில் தனியார் அனல் மின் நிலையம் அமைக்கும் திட்டத்தை கைவிட வேண்டும் என்பன உள்ளிட்ட பல்வேறு கோரிக்கைகளை வலியுறுத்தி, ஒன்றிய மற்றும் மாநில அரசுகளை கண்டித்து நெல்லையில் தொமுச சார்பில் கண்டன ஆர்ப்பாட்டம் நடைபெற்றது.
நெல்லை மாவட்ட தொழிலாளர் முன்னேற்ற சங்க பேரவை சார்பில் நடைபெற்ற இந்த ஆர்ப்பாட்டம், வண்ணார்பேட்டையில் நடைபெற்றது. பேரவை நிர்வாகி முருகன் தலைமையில் நடைபெற்ற போராட்டத்தில், தொழிலாளர்கள் மற்றும் சங்க நிர்வாகிகள் கலந்து கொண்டு பல்வேறு கோரிக்கைகளை வலியுறுத்தி முழக்கங்களை எழுப்பினர்.
விலைவாசி உயர்வை உடனடியாக கட்டுப்படுத்த வேண்டும், பொதுத்துறை நிறுவனங்களின் பங்குகளை விற்பனை செய்வதை கைவிட வேண்டும், தூத்துக்குடியில் தனியார் அனல் மின் நிலையம் அமைப்பதை நிறுத்த வேண்டும் என ஆர்ப்பாட்டத்தில் வலியுறுத்தப்பட்டது.
மேலும், விவசாயிகளுக்கு வழங்கப்பட்ட தேர்தல் வாக்குறுதியின்படி கூட்டுறவு பயிர்க்கடன்களை முழுமையாக தள்ளுபடி செய்ய வேண்டும் என்றும், போக்குவரத்து, மின்சாரம், டாஸ்மாக், தூய்மை பணி உள்ளிட்ட துறைகளை தனியாருக்கு தாரைவார்க்கக் கூடாது என்றும் கோரிக்கை விடுக்கப்பட்டது.
ஆர்ப்பாட்டத்தில் தொமுச பஞ்சாலை தொழிலாளர் சங்க செயலாளர் பரணிசேகர் சிறப்பு அழைப்பாளராக கலந்து கொண்டு கோரிக்கைகள் குறித்து விளக்கிப் பேசினார். தொடர்ந்து தொழிலாளர்கள் கோரிக்கைகளை வலியுறுத்தி முழக்கங்களை எழுப்பினர்.
இந்த கண்டன ஆர்ப்பாட்டத்தில் நூற்றுக்கும் மேற்பட்ட தொழிலாளர்கள் கலந்து கொண்டனர்.