விருதுநகர் நகர்மன்றத்தின் கவனத்திற்குக்கொண்டு வராமல் மறைமுகமாகச் சொத்து வரியை உயர்த்த நடவடிக்கை எடுக்கப்படுவதாகக் குற்றம்சாட்டி, நடைபெற்ற அவசரக் கூட்டத்தில் உறுப்பினர்கள் கடும் எதிர்ப்பைப் பதிவு செய்தனர். மேலும், காமராஜர் சிலை பராமரிப்பு விவகாரத்தில் நகர்மன்றத் தலைவரின் பதிலில் திருப்தியடையாத காங்கிரஸ் உறுப்பினர்கள் 8 பேர் கூட்டத்திலிருந்து வெளிநடப்பு செய்ததால் நகராட்சி வளாகத்தில் பெரும் பரபரப்பு ஏற்பட்டது.
விருதுநகர் நகராட்சி அவசரக் கூட்டம், நகர்மன்றத் தலைவர் மாதவன் தலைமையில் நடைபெற்றது. நகராட்சிப் பொறியாளர் விஜயகுமார் மற்றும் நகர்மன்றத் துணைத் தலைவர் தனலட்சுமி ஆகியோர் முன்னிலை வகித்த இக்கூட்டத்தில், பல்வேறு மக்கள் பிரச்சினைகள் குறித்து நகர்மன்ற உறுப்பினர்களுக்கும் அதிகாரிகளுக்கும் இடையே காரசார விவாதம் நடைபெற்றது.
சொத்து வரி உயர்வு குறித்துக் கடும் விவாதம்
கூட்டத்தில் சொத்து வரி உயர்வு விவகாரம் தொடர்பாகக் கடுமையான விவாதம் எழுந்தது. இதுகுறித்து நகர்மன்ற உறுப்பினர்கள் ஜெயக்குமார், பேபி, மைக்கேல்ராஜ், வெங்கடேஷ், சரவணன் உள்ளிட்டோர் பேசுகையில், "ஏற்கனவே ஏழை, எளிய மக்களின் வீடுகளுக்கு ₹100-க்கும் குறைவாக இருந்த சொத்து வரியை, நகர்மன்றத்தின் கவனத்திற்குக் கொண்டு வராமல் தன்னிச்சையாக உயர்த்தினர். தற்போது ₹200-க்கும் குறைவாகச் சொத்து வரி உள்ள வீடுகளுக்கும், நகராட்சி ஆணையரின் உத்தரவின் பேரில் மறைமுகமாக வரியை உயர்த்தும் பணி நடைபெற்று வருகிறது. இதனால் ஏழை, எளிய மக்கள் கடுமையாகப் பாதிக்கப்படுவர்" எனக் கூறி கடும் கண்டனத்தைத் தெரிவித்தனர்.
இதற்குப் பதிலளித்த நகராட்சி ஆணையர், "குறைவான வரி செலுத்தும் சொத்துக்களுக்கு வரியை உயர்த்தச் சட்டத்தில் வழிவகை உள்ளது" என்று விளக்கமளித்தார். ஆணையரின் இந்த பதிலால் ஆத்திரமடைந்த உறுப்பினர்கள், "வீட்டின் உரிமையாளர், நகர்மன்றத் தலைவர் மற்றும் வார்டு உறுப்பினர்களுக்குத் தெரிவிக்காமல் வரியை உயர்த்த அதிகாரிகளுக்கு என்ன அதிகாரம் உள்ளது? இது மக்களாட்சியா அல்லது மன்னராட்சியா?" எனச் சரமாரியாகக் கேள்விகளை எழுப்பினர்.
அப்போது குறுக்கிட்டுப் பேசிய நகர்மன்றத் தலைவர், "சொத்து வரியை உயர்த்தும்போது நகர்மன்றத் தலைவரிடம் ஏன் தெரிவிக்கவில்லை? பொதுமக்கள் எங்களிடம் தான் கேள்வி கேட்பார்கள். எனவே, இதுகுறித்து உயர் அதிகாரிகளுக்கு உரிய புகார்க் கடிதம் அனுப்பப்படும்" என உறுப்பினர்களுக்கு உறுதியளித்தார்.
காமராஜர் சிலை பராமரிப்பு மற்றும் வெளிநடப்பு
முன்னதாக, பெருந்தலைவர் காமராஜரின் பிறந்தநாளையொட்டி நகராட்சி வளாகத்தில் உள்ள அவரது சிலைக்கு ஏன் வர்ணம் பூசிப் பராமரிக்கப்படவில்லை எனப் பால்பாண்டி உள்ளிட்ட காங்கிரஸ் உறுப்பினர்கள் கேள்வி எழுப்பினர்.
அதற்குப் பதிலளித்த நகர்மன்றத் தலைவர், "காமராஜர் இல்லத்திற்குச் செல்லும் வழியில் புதிய நவீன விளக்குகள் பொருத்தப்பட்டுள்ளன. மேலும், நகராட்சியில் உள்ள அவரது சிலையைச் சுற்றி வண்ணச் சரவிளக்குகள் அமைக்கப்பட்டுச் சிறப்பிக்கப்பட்டுள்ளது" என்றார்.
எனினும், நகர்மன்றத் தலைவரின் பதிலில் திருப்தியடையாத காங்கிரஸ் உறுப்பினர்கள் 8 பேர், தங்களது அதிருப்தியைத் தெரிவித்துக் கூட்டத்தில் இருந்து திடீரென வெளிநடப்பு செய்தனர். இந்த அவசரக் கூட்டம் நகராட்சி வளாகத்தில் பெரும் பரபரப்பை ஏற்படுத்தியது.