மகாத்மா காந்தியின் பிறந்தநாள் மற்றும் பெருந்தலைவர் காமராஜரின் நினைவு நாளை முன்னிட்டு, கோவை நரசிம்மநாயக்கன்பாளையம் பகுதியில் பல்வேறு நிகழ்ச்சிகள் நடைபெற்றன.
இதையொட்டி, கவுண்டம்பாளையம் சட்டமன்ற உறுப்பினர் R.D. கனிமொழி சந்தோஷ், மகாத்மா காந்தி மற்றும் பெருந்தலைவர் காமராஜரின் உருவப்படங்கள் மற்றும் சிலைகளுக்கு மாலை அணிவித்து மரியாதை செலுத்தினார்.
இதனைத் தொடர்ந்து, நரசிம்மநாயக்கன்பாளையம் பேரூராட்சியில் பணியாற்றி வரும் தூய்மைப் பணியாளர்களுக்கு பணியின் போது பயன்படுத்துவதற்கான பாதுகாப்பு உபகரணங்கள் வழங்கப்பட்டன.
மேலும், மாற்றுத்திறனாளிகளின் அன்றாட பயன்பாட்டிற்கு உதவும் வகையில் தமிழ்நாடு அரசு சார்பில் பல்வேறு உதவி உபகரணங்கள் பயனாளிகளுக்கு வழங்கப்பட்டன. இதில் நடைக்குச்சி, செவித்திறன் கருவி, சக்கர உதவியுடன் நடப்பதற்கான ரோலேட்டர் உள்ளிட்ட உபகரணங்கள் இடம்பெற்றன.
மாற்றுத்திறனாளிகளின் தேவைகளை கருத்தில் கொண்டு வழங்கப்பட்ட இந்த உதவி உபகரணங்கள், அவர்களின் அன்றாட செயல்பாடுகளை எளிதாக்கும் வகையில் பயனுள்ளதாக இருக்கும் என தெரிவிக்கப்பட்டது.
இந்த நிகழ்ச்சியில் பெரியநாயக்கன்பாளையம் கிழக்கு ஒன்றிய செயலாளர் V. நிதின், இணைச் செயலாளர் சம்பத், நரசிம்மநாயக்கன்பாளையம் நகரச் செயலாளர் கார்த்திகேயன், இணைச் செயலாளர் பூபதி உள்ளிட்ட கட்சி நிர்வாகிகள், மகளிர் அணி நிர்வாகிகள் மற்றும் பொதுமக்கள் கலந்து கொண்டனர்.