பெரம்பலூர் மாவட்ட ஆட்சியர் அலுவலக கூட்டரங்கில், மாவட்ட வளர்ச்சி ஒருங்கிணைப்பு மற்றும் கண்காணிப்புக் குழுக் கூட்டம் நடைபெற்றது. இக்கூட்டத்திற்கு குழுவின் தலைவரும், பெரம்பலூர் நாடாளுமன்ற உறுப்பினருமான அருண் நேரு மற்றும் இணைத் தலைவரும், சிதம்பரம் நாடாளுமன்ற உறுப்பினருமான திருமாவளவன் ஆகியோர் தலைமை வகித்தனர். மாவட்ட ஆட்சியர் அப்துல் ராசிக் முன்னிலை வகித்தார்.
கூட்டத்தில், மத்திய மற்றும் மாநில அரசுகளின் பல்வேறு திட்டங்களின் செயல்பாடுகள் குறித்து விரிவாக ஆய்வு மேற்கொள்ளப்பட்டது.
பல்வேறு அரசுத் திட்டங்கள் குறித்து ஆய்வு
மகாத்மா காந்தி தேசிய ஊரக வேலை உறுதித் திட்டம், பிரதம மந்திரி கிராம சாலை திட்டம், அனைவருக்கும் வீடு வழங்கும் திட்டம், தூய்மை பாரத இயக்கம், ஜல் ஜீவன் இயக்கம், தேசிய சமூக பாதுகாப்புத் திட்டம், தேசிய வேளாண் வளர்ச்சித் திட்டம் உள்ளிட்ட பல்வேறு திட்டங்களின் செயல்பாடுகள் குறித்து ஆய்வு செய்யப்பட்டது.
மேலும், நாடாளுமன்ற உறுப்பினர் உள்ளூர் வளர்ச்சித் திட்டம், மத்திய நிதிக்குழு மானியம், பிரதம மந்திரியின் நுண்ணீர் பாசனத் திட்டம், பி.எம்.கிசான் திட்டம், ஒருங்கிணைந்த குழந்தைகள் வளர்ச்சித் திட்டம், மதிய உணவுத் திட்டம், ஒருங்கிணைந்த மின் மேம்பாட்டுத் திட்டம் மற்றும் தமிழ்நாடு விளையாட்டு மேம்பாட்டு ஆணையம் சார்ந்த திட்டங்களின் செயல்பாடுகளும் பரிசீலிக்கப்பட்டன.
ஒவ்வொரு திட்டத்தின் கீழும் மேற்கொள்ளப்பட்ட பணிகள், பயனடைந்த பயனாளிகளின் எண்ணிக்கை, திட்டங்களுக்காக ஒதுக்கப்பட்ட நிதி முறையாக பயன்படுத்தப்பட்டுள்ளதா என்பது குறித்தும் அதிகாரிகளிடம் விவரங்கள் கேட்கப்பட்டன.
தகுதியான பயனாளிகளுக்கு திட்டங்கள் சென்றடைய அறிவுறுத்தல்
வேளாண்மை, நெடுஞ்சாலை, பள்ளிக்கல்வி, தோட்டக்கலை உள்ளிட்ட பல்வேறு துறைகள் மூலம் செயல்படுத்தப்படும் அரசுத் திட்டங்களில் நிர்ணயிக்கப்பட்ட இலக்குகள் முழுமையாக எட்டப்பட்டுள்ளனவா என்பது குறித்தும் ஆய்வு மேற்கொள்ளப்பட்டது.
மேலும், திட்டங்களுக்கான பயனாளிகள் எவ்வாறு தேர்வு செய்யப்படுகின்றனர், தகுதியான அனைவருக்கும் அரசின் நலத்திட்டங்கள் சென்றடைகின்றனவா என்பதும் ஆய்வு செய்யப்பட்டது.
மத்திய மற்றும் மாநில அரசுத் திட்டங்களின் மூலம் பொதுமக்களுக்கு சீரான குடிநீர், சாலை வசதி உள்ளிட்ட அடிப்படை வசதிகளை ஏற்படுத்தித் தர அதிகாரிகள் உரிய நடவடிக்கை எடுக்க வேண்டும் என கூட்டத்தில் அறிவுறுத்தப்பட்டது.
பணிகளை நிதியாண்டுக்குள் முடிக்க உத்தரவு
அரசுத் திட்டங்களை செயல்படுத்தும்போது ஏற்படும் இடர்பாடுகளை உயர் அதிகாரிகளின் கவனத்திற்கு கொண்டு வந்தால், அவற்றுக்கு விரைந்து தீர்வு காண நடவடிக்கை மேற்கொள்ள முடியும் என தெரிவிக்கப்பட்டது.
ஒவ்வொரு நிதியாண்டிற்கும் ஒதுக்கப்படும் பணிகளை சம்பந்தப்பட்ட துறை அலுவலர்கள் அந்தந்த நிதியாண்டிற்குள்ளேயே நிறைவு செய்து, அதன் பயன்களை பொதுமக்களுக்கு கிடைக்கச் செய்ய வேண்டும் எனவும் அறிவுறுத்தப்பட்டது.
அரசின் அனைத்து நலத்திட்டங்களுக்கும் தகுதியான பயனாளிகளை முறையாக கண்டறிந்து, அவர்களுக்கு உரிய திட்டப் பயன்கள் கிடைப்பதை உறுதி செய்ய வேண்டும் என்றும் வலியுறுத்தப்பட்டது.
கூட்டத்தில் சட்டமன்ற உறுப்பினர் சிவக்குமார் மற்றும் பல்வேறு துறைகளைச் சேர்ந்த அரசு அலுவலர்கள் கலந்து கொண்டனர்.