தி.மு.க. தலைவர் மு.க.ஸ்டாலின் மீது தேர்தல் ஆணையத்தில் தவெக புகார்

தாராபுரம் இடைத்தேர்தல் பிரசாரத்தின்போது தி.மு.க. தலைவர் மு.க.ஸ்டாலின் பேசிய கருத்துகளுக்கு எதிர்ப்பு தெரிவித்து, தமிழக வெற்றிக் கழகம் (தவெக) சார்பில் தேர்தல் ஆணையத்தில் புகார் அளிக்கப்பட்டுள்ளது. தாராபுரத்தில் மதச்சார்பற்ற முற்போக்குக் கூட்டணி வேட்பாளரை ஆதரித்து நடைபெற்ற பிரசார பொதுக்கூட்டத்தில் மு.க.ஸ்டாலின் பேசினார். அப்போது தவெக வேட்பாளர் சத்தியபாமா தொடர்பாக அவர் தெரிவித்த கருத்துகள் சர்ச்சையை ஏற்படுத்தியதாக கூறப்படுகிறது. இதற்கு எதிர்ப்பு தெரிவித்த தவெக வழக்கறிஞர் அணி, மு.க.ஸ்டாலின் தேர்தல் நடத்தை விதிகளை மீறியதாக தேர்தல் ஆணையத்திடம் புகார் அளித்துள்ளது. மேலும், பெண்களை அவமதிக்கும் வகையிலான கருத்துகள் தொடர்பாக உரிய சட்டப்பிரிவுகளின் கீழ் நடவடிக்கை எடுக்க வேண்டும் என்றும் புகாரில் கோரப்பட்டுள்ளதாக தகவல் வெளியாகியுள்ளது. மேலும், இதே விவகாரம் தொடர்பாக தமிழக காவல்துறை தலைமை இயக்குநரிடமும் தவெக தரப்பில் புகார் அளிக்கப்பட்டுள்ளதாக தெரிவிக்கப்பட்டுள்ளது. புகாரின் அடிப்படையில் தேர்தல் ஆணையம் மற்றும் காவல்துறை தரப்பில் அடுத்தகட்ட நடவடிக்கை என்ன என்பது எதிர்பார்ப்பை ஏற்படுத்தியுள்ளது. தாராபுரம் இடைத்தேர்தலை முன்னிட்டு தி.மு.க. மற்றும் தவெக இடையே பிரசாரம் தீவிரமடைந்துள்ள நிலையில், இரு தரப்பினருக்கும் இடையிலான அரசியல் மோதல் தற்போது தேர்தல் ஆணைய புகார் வரை சென்றுள்ளது.