ஜெயங்கொண்டம் அருகே வயது மூப்பின் காரணமாக கணவர் உயிரிழந்த அதிர்ச்சியில், சில மணி நேரத்தில் மனைவியும் உயிரிழந்த சம்பவம் கிராம மக்களிடையே பெரும் சோகத்தை ஏற்படுத்தியுள்ளது.
அரியலூர் மாவட்டம் ஜெயங்கொண்டம் அருகே கோடாலி கருப்பூர், வக்கரமாரி கிராமம் வடக்குத் தெருவைச் சேர்ந்தவர் ஆறுமுகம் – பழனியம்மாள் தம்பதி. இவர்களுக்கு குழந்தைகள் இல்லாத நிலையில், இருவரும் ஒருவருக்கொருவர் அன்பும் ஆதரவுமாக வாழ்ந்து வந்ததாக கூறப்படுகிறது.
ஆறுமுகம் கூலி தொழிலாளியாக பணியாற்றி வந்த நிலையில், வயது மூப்பின் காரணமாக உயிரிழந்தார். அவரது உயிரிழப்பு குறித்து தகவல் அறிந்த மனைவி பழனியம்மாள், கணவரின் பிரிவை தாங்க முடியாமல் அழுதுகொண்டிருந்ததாக கூறப்படுகிறது.
இந்நிலையில், கணவர் உயிரிழந்த சில மணி நேரத்திலேயே பழனியம்மாளும் உயிரிழந்தார்.
குழந்தைகள் இல்லாத நிலையில் ஒருவருக்கொருவர் ஆதரவாக வாழ்ந்து வந்த தம்பதி, அடுத்தடுத்து உயிரிழந்த சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.
வாழ்வில் மட்டுமின்றி இறப்பிலும் இணைபிரியாத தம்பதியின் மறைவு கிராம மக்களை சோகத்தில் ஆழ்த்தியுள்ளது.