ராஜபாளையம் மற்றும் சுற்றுவட்டாரப் பகுதிகளில் கூலி உயர்வு, வேலை இழப்பு நிவாரணம் உள்ளிட்ட கோரிக்கைகளை வலியுறுத்தி போராட்டத்தில் ஈடுபட்டு வரும் கைத்தறி நெசவாளர்களை மார்க்சிஸ்ட் கம்யூனிஸ்ட் கட்சியின் மத்திய குழு உறுப்பினர் பாலபாரதி சந்தித்து அவர்களது கோரிக்கைகள் குறித்து கேட்டறிந்தார். ராஜபாளையம் அருகே புனல்வேலி பகுதியில் நெசவாளர்களை சந்தித்த பாலபாரதி, அவர்களது வாழ்வாதாரப் பிரச்சினைகள் மற்றும் அடுத்தகட்ட போராட்டங்கள் குறித்து ஆலோசனை நடத்தினார்.
கூலி உயர்வு கோரிக்கை
பின்னர் செய்தியாளர்களிடம் பேசிய பாலபாரதி, ராஜபாளையம், ஸ்ரீவில்லிபுத்தூர் உள்ளிட்ட பகுதிகளில் வசிக்கும் 15,000-க்கும் மேற்பட்ட நெசவாளர் குடும்பங்கள் கடந்த சில மாதங்களாக வாழ்வாதார பாதிப்பை எதிர்கொண்டு வருவதாக தெரிவித்தார். 2027 பொங்கல் இலவச வேட்டி–சேலை திட்டத்திற்காக அறிமுகப்படுத்தப்பட்டுள்ள புதிய ரக சேலை காரணமாகவே தற்போதைய பிரச்சினை ஏற்பட்டுள்ளதாக அவர் கூறினார். பழைய ரக சேலையில் ஒரு நாளைக்கு 3 சேலைகள் வரை நெய்ய முடிந்த நிலையில், புதிய ரகத்தில் 2 சேலைகள் மட்டுமே நெய்ய முடிவதாக நெசவாளர்கள் தெரிவிப்பதாகவும் அவர் குறிப்பிட்டார்.
அரசு நிர்ணயித்துள்ள ₹114 கூலியில் பிடித்தம் போக தினசரி சுமார் ₹80 மட்டுமே நெசவாளர்களுக்கு கிடைப்பதாக கூறிய அவர், தற்போதைய விலைவாசி சூழலில் இந்தத் தொகை போதுமானதாக இல்லை என்றும் தெரிவித்தார். எனவே, ஒரு சேலைக்கு ₹250 கூலி வழங்க வேண்டும் என்பது நெசவாளர்களின் முக்கிய கோரிக்கையாக இருப்பதாக கூறினார். ராஜபாளையம் சுற்றுவட்டாரத்தில் புதிய ரக சேலைக்கு ₹250 கூலி நிர்ணயம் செய்ய வேண்டும், வேலை இழந்த காலத்துக்கு நிவாரணம் வழங்க வேண்டும், கூட்டுறவு சங்கங்களில் தேங்கியுள்ள பழைய சேலைகளை கொள்முதல் செய்ய வேண்டும் உள்ளிட்ட கோரிக்கைகளை முன்வைத்து நெசவாளர்கள் தொடர்ந்து போராடி வருவது குறித்து ஏற்கெனவே செய்திகள் வெளியாகியுள்ளன.
கூலி உயர்வு மற்றும் வாழ்வாதாரக் கோரிக்கைகளை வலியுறுத்தி நெசவாளர்கள் சாலை மறியல், கஞ்சி தொட்டி, பிச்சை எடுக்கும் போராட்டம் உள்ளிட்ட பல்வேறு போராட்டங்களில் ஈடுபட்டுள்ளனர்.
செப்டம்பர் 22-ஆம் தேதி நடைபெற்ற பேச்சுவார்த்தையில் கூட்டுறவு சங்கங்களில் இருப்பில் உள்ள பழைய சேலைகளை கொள்முதல் செய்வது தொடர்பாக உடன்பாடு ஏற்பட்டதால், அப்போது அறிவிக்கப்பட்டிருந்த தொடர் போராட்டம் தற்காலிகமாக ஒத்திவைக்கப்பட்டது. புதிய ரக சேலைக்கான கூலி நிர்ணயம் உள்ளிட்ட கோரிக்கைகள் தொடர்ந்து முன்வைக்கப்பட்டு வருகின்றன.
அக்டோபர் 5 முதல் காத்திருப்பு போராட்டம்
இந்நிலையில், நெசவாளர்களின் கோரிக்கைகளுக்கு உடனடி தீர்வு காணப்படாவிட்டால், அக்டோபர் 5-ஆம் தேதி முதல் நெசவாளர்கள் மற்றும் பொதுமக்களை திரட்டி காலவரையற்ற காத்திருப்பு போராட்டம் நடத்த உள்ளதாக பாலபாரதி தெரிவித்தார். மேலும், மாவட்ட ஆட்சியர் மற்றும் சம்பந்தப்பட்ட அமைச்சர்கள் நெசவாளர்களின் பகுதிகளுக்கு நேரில் சென்று அவர்களது வாழ்வாதார நிலையை ஆய்வு செய்து, கோரிக்கைகள் தொடர்பாக உரிய நடவடிக்கை எடுக்க வேண்டும் என்றும் அவர் வலியுறுத்தினார்.