மகளிர் இலவச பேருந்து - நாளை தொடங்கும் 'வெற்றிப்பயணம்' திட்டம்!

தமிழகத்தில் பெண்களுக்கான கட்டணமில்லா பேருந்து பயணத் திட்டம் விரிவுபடுத்தப்பட்டு, ‘வெற்றிப்பயணம்’ என்ற பெயரில் நாளை (அக்டோபர் 2) முதல் அமலுக்கு வருகிறது. இதன்மூலம் மாநிலம் முழுவதும் கூடுதல் வகை அரசு பேருந்துகளில் பெண்கள் கட்டணமின்றி பயணம் செய்யும் வசதி கிடைக்கிறது. தமிழக சட்டசபையில் கடந்த ஆகஸ்டு 24-ஆம் தேதி விதி எண் 110-ன் கீழ் முதல்-அமைச்சர் விஜய் இந்தத் திட்டத்தை அறிவித்திருந்தார். மகளிர் கட்டணமில்லா பயணத் திட்டத்தை விரிவுபடுத்தி, ‘வெற்றிப்பயணம்’ என்ற பெயரில் அக்டோபர் 2-ஆம் தேதி முதல் செயல்படுத்தப்படும் என அவர் தெரிவித்திருந்தார்.

12,692 அரசு பேருந்துகளில் விரிவாக்கம்

தற்போது 7 அரசு போக்குவரத்துக் கழகங்களின் நகர சாதாரண பேருந்துகள் மற்றும் 40 கி.மீ. வரையிலான மலைப்பகுதி சாதாரண பேருந்துகளில் பெண்கள் கட்டணமின்றி பயணம் செய்து வருகின்றனர்.

‘வெற்றிப்பயணம்’ திட்டத்தின் மூலம் மாநகர மற்றும் நகர்ப்புறங்களில் இயக்கப்படும் எக்ஸ்பிரஸ், எல்.எஸ்.எஸ்., டீலக்ஸ், புறநகர் சாதாரண பேருந்துகள் மற்றும் 40 கி.மீ.க்கு மேற்பட்ட மலைப்பகுதி சாதாரண பேருந்துகளுக்கும் இந்த வசதி விரிவுபடுத்தப்படுகிறது.

இதன்படி, மொத்தம் 12,692 அரசு பேருந்துகள் திட்டத்தின் கீழ் கொண்டுவரப்படுகின்றன. 7 அரசு போக்குவரத்துக் கழகங்கள் இயக்கும் 18,413 திட்டமிடப்பட்ட பேருந்துகளில் இது 69 சதவீதமாகும்.

நாள்தோறும் 84.32 லட்சம் பெண்கள் பயன்பெறுவர்

திட்டத்தின் கீழ் இயக்கப்படும் பேருந்துகளில் மொத்தம் 1,94,649 நடைகளில் 1,65,312 நடைகள் இயக்கப்படும் என தெரிவிக்கப்பட்டுள்ளது. இதன்மூலம் நாள்தோறும் சுமார் 84.32 லட்சம் பெண்கள் பயனடைவார்கள் என அரசு தரப்பில் தெரிவிக்கப்பட்டுள்ளது. மேலும், திட்டத்தின் கீழ் இயக்கப்படும் பேருந்துகளின் மின்னணு பயணச்சீட்டு இயந்திரங்களுடன் (ETM) இணைக்கும் பணியும் நிறைவடைந்துள்ளது. கடந்த செப்டம்பர் 25-ஆம் தேதி சோதனை மற்றும் சரிபார்ப்பு பணிகளும், செப்டம்பர் 27-ஆம் தேதி சோதனை ஓட்டமும் நடைபெற்றதாக தெரிவிக்கப்பட்டுள்ளது.

மாணவிகள், பணிக்கு செல்லும் பெண்களுக்கு பயன்

‘வெற்றிப்பயணம்’ திட்டத்தின் மூலம் மாணவிகள் தொலைதூரத்தில் உள்ள கல்லூரிகளுக்குச் செல்லவும், பெண்கள் பணியிடங்களுக்குச் செல்லவும், மருத்துவம் உள்ளிட்ட அத்தியாவசிய தேவைகளுக்காகவும் கட்டணமின்றி அரசு பேருந்துகளில் பயணம் செய்ய முடியும் என தெரிவிக்கப்பட்டுள்ளது.

அதே நேரத்தில், மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் காரணமாக தேர்தல் நடத்தை விதிமுறைகள் அமலில் உள்ள செங்கல்பட்டு மற்றும் திருப்பூர் மாவட்டங்களில், அந்த விதிமுறைகள் விலக்கிக் கொள்ளப்பட்ட பின்னர் திட்டம் செயல்படுத்தப்படும் என தெரிவிக்கப்பட்டுள்ளது.

முதல்-அமைச்சர் விஜய் நாளை அக்டோபர் 2-ஆம் தேதி ‘வெற்றிப்பயணம்’ திட்டத்தை தொடங்கி வைக்க உள்ளதாக தினத்தந்தி செய்தி தெரிவிக்கிறது.