வடகிழக்குப் பருவமழையை முன்னிட்டு, புதுச்சேரியில் பேனர்கள், கட்-அவுட்கள், விளம்பரப் பலகைகள் உள்ளிட்ட தற்காலிக விளம்பர அமைப்புகளுக்கு இன்று (செப்டம்பர் 29) முதல் தடை விதிக்கப்பட்டுள்ளது. இந்த உத்தரவு புதுச்சேரி மாவட்ட கலெக்டர் குலோத்துங்கனால் பிறப்பிக்கப்பட்டுள்ளது.
பொது, தனியார் இடங்களிலும் தடை
பொது மற்றும் தனியார் இடங்கள், சாலை ஓரங்கள், சாலைத் தடுப்புகள் உள்ளிட்ட பகுதிகளில் பேனர்கள், கட்-அவுட்கள், பிளக்ஸ் போர்டுகள், விளம்பரப் பலகைகள், வளைவுகள் உள்ளிட்ட தற்காலிக காட்சி அமைப்புகளை நிறுவவோ, பொருத்தவோ, காட்சிப்படுத்தவோ தடை விதிக்கப்பட்டுள்ளது.
வடகிழக்குப் பருவமழையின்போது பலத்த காற்றுடன் கனமழை பெய்யக்கூடிய சூழல் இருப்பதால், இதுபோன்ற விளம்பர அமைப்புகள் சரிந்து விழுந்து பொதுமக்கள், வாகனங்கள் மற்றும் பொது உள்கட்டமைப்புகளுக்கு பாதிப்பு ஏற்படுவதைத் தடுக்கும் வகையில் இந்த நடவடிக்கை எடுக்கப்பட்டுள்ளதாக தெரிவிக்கப்பட்டுள்ளது.
ஏற்கனவே வைக்கப்பட்டுள்ள பேனர்களையும் அகற்ற உத்தரவு
புதுச்சேரியில் ஏற்கனவே வைக்கப்பட்டுள்ள பேனர்கள், கட்-அவுட்கள், விளம்பரப் பலகைகள் மற்றும் பிளக்ஸ் போர்டுகளை சம்பந்தப்பட்ட தனிநபர்கள் அல்லது நிறுவனங்கள் உடனடியாக அகற்ற வேண்டும் என உத்தரவிடப்பட்டுள்ளது.
மேலும், விதிமீறி வைக்கப்பட்டுள்ள விளம்பர அமைப்புகளை முன் அறிவிப்பின்றி அகற்றுவதற்காக நகராட்சி, கொம்யூன் பஞ்சாயத்து, பொதுப்பணித்துறை மற்றும் காவல்துறை அதிகாரிகள் அடங்கிய சிறப்புக் குழுக்கள் கண்காணிப்பில் ஈடுபட உள்ளன. அவற்றை அகற்றுவதற்கான செலவு சம்பந்தப்பட்ட விதிமீறியவர்களிடமிருந்து வசூலிக்கப்படும் என தெரிவிக்கப்பட்டுள்ளது.