மயிலாடுதுறையில், தமிழ்நாடு ஓய்வூதியர்கள் பாதுகாப்பு இயக்கம் சார்பில் 27 அம்சக் கோரிக்கைகளை வலியுறுத்தி நூற்றுக்கும் மேற்பட்டோர் பங்கேற்ற மனித சங்கிலி போராட்டம் நடைபெற்றது.
மயிலாடுதுறை கோட்டாட்சியர் அலுவலகம் முன்பு நடைபெற்ற இப்போராட்டத்தில், ஓய்வுபெற்ற அரசு ஊழியர் சங்கம், ஓய்வுபெற்ற தலைமை ஆசிரியர்கள் சங்கம், அகில இந்திய இபிஎஸ் 95 ஓய்வூதியர்கள் நல சங்கம் மற்றும் ஓய்வுபெற்ற காவலர் நல சங்கம் உள்ளிட்ட பல்வேறு சங்கங்களைச் சேர்ந்த நூற்றுக்கும் மேற்பட்ட ஓய்வூதியர்கள் கலந்துகொண்டனர்.
முக்கிய கோரிக்கைகள்:
- 8-வது ஊதியக்குழுவின் ஆய்வு வரம்புகளில் ஓபிஎஸ் ஓய்வூதியர்களுக்கான திருத்தங்களை வெளிப்படையாக உள்ளடக்குவது.
- ஓய்வூதிய சரிபார்ப்பு சட்டம் 2025-ஐ திரும்பப் பெறுவது.
- தமிழக அரசின் உத்தரவாதப்படுத்தப்பட்ட ஓய்வூதியத் திட்டத்தை ரத்து செய்துவிட்டு, பழைய ஓய்வூதியத் திட்டத்தை மீண்டும் அமல்படுத்துவது.
- 70 வயது நிறைவடையும் போது 10 சதவீதமும், 80 வயது தொடங்கும் போது மேலும் 10 சதவீதமும் கூடுதல் ஓய்வூதியம் வழங்குவது.
- மாதாந்திர மருத்துவப் படியை ரூ.1,000 ஆக உயர்த்துவது.
- ஓய்வூதியர் குடும்பப் பாதுகாப்பகத் திட்ட நிதி உதவியை ரூ.50,000-ல் இருந்து ரூ.1,50,000 ஆக உயர்த்துவது.
உள்ளிட்ட 27 அம்சக் கோரிக்கைகளை வலியுறுத்தி இந்தப் போராட்டம் நடத்தப்பட்டது. போராட்டத்தின் நிறைவாக, தமிழ்நாடு ஓய்வுபெற்ற அரசு ஊழியர் சங்கத்தின் மாநிலப் பொதுச் செயலாளர் மகாலிங்கம் நிறைவுரையாற்றினார்.









