திண்டுக்கல் மாவட்டம், நிலக்கோட்டை அருகே போக்சோ வழக்கில் கடந்த 6 மாதங்களாக தலைமறைவாக இருந்த அக்னிபாத் பயிற்சி வீரரை காவல்துறையினர் கைது செய்துள்ளனர்.
நிலக்கோட்டை அனைத்து மகளிர் காவல் நிலைய எல்லைக்கு உட்பட்ட அணைப்பட்டி அருகேயுள்ள மல்லியம்பட்டி கிராமத்தைச் சேர்ந்தவர் அக்னிபாத் பயிற்சி வீரர் உதயகுமார் (21). இவர் சிறுமி ஒருவரை திருமணம் செய்து கொள்வதாக ஆசை வார்த்தை கூறி பாலியல் வன்கொடுமை செய்ததாகக் கூறப்படுகிறது.
இதுகுறித்து அச்சிறுமியின் பெற்றோர் அளித்த புகாரின் அடிப்படையில், நிலக்கோட்டை அனைத்து மகளிர் காவல் நிலையத்தில் உதயகுமார் மீது போக்சோ சட்டத்தின் கீழ் வழக்குப்பதிவு செய்யப்பட்டது. வழக்குப்பதிவு செய்யப்பட்டதை அறிந்த உதயகுமார் தலைமறைவானார்.
இதனைத் தொடர்ந்து, திண்டுக்கல் மாவட்ட காவல் கண்காணிப்பாளர் ஜெயக்குமார் உத்தரவின்பேரில், நிலக்கோட்டை துணை காவல் கண்காணிப்பாளர் இளஞ்செழியன் தலைமையில் தனிப்படை அமைக்கப்பட்டது. நிலக்கோட்டை அனைத்து மகளிர் காவல் நிலைய காவலர்கள் தீவிர விசாரணை மேற்கொண்டு, தொழில்நுட்ப உதவியுடன் 6 மாதங்களாக தலைமறைவாக இருந்த உதயகுமாரைக் கைது செய்து சிறையில் அடைத்தனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.









