வேலூர் 10-வது தமிழ்நாடு பட்டாலியன் என்.சி.சி சார்பில், வாணியம்பாடி இஸ்லாமியா தன்னாட்சி கல்லூரியில் 10 நாட்கள் நடைபெறும் என்.சி.சி பயிற்சி முகாமின் ஒரு பகுதியாக, என்.சி.சி தின விழா கோலாகலமாக கொண்டாடப்பட்டது.
சென்னை, வேலூர், திருவண்ணாமலை, திருப்பத்தூர் உள்ளிட்ட பல்வேறு மாவட்டங்களைச் சேர்ந்த பள்ளி மற்றும் கல்லூரி மாணவ-மாணவிகள் இந்த முகாமில் தீவிரமாகப் பயிற்சி பெற்று வருகின்றனர். இந்நிலையில், என்.சி.சி தினத்தையொட்டி சுற்றுச்சூழல் பாதுகாப்பை வலியுறுத்தும் வகையில் மரக்கன்றுகள் நடும் நிகழ்ச்சி நடத்தப்பட்டது. அதனைத் தொடர்ந்து, இளைஞர்களிடையே போதைப்பொருள் பயன்பாட்டின் தீமைகள் குறித்து விழிப்புணர்வு ஏற்படுத்தும் வகையில் பிரம்மாண்ட பேரணி நடைபெற்றது.
இந்நிகழ்ச்சியை வேலூர் 10-வது தமிழ்நாடு பட்டாலியன் என்.சி.சி கட்டளை அதிகாரி லெப்டினன்ட் கர்னல் வெங்கடீஷ், நிர்வாக அதிகாரி லெப்டினன்ட் கர்னல் சுரேந்திரன் மற்றும் வாணியம்பாடி இஸ்லாமியா கல்லூரி துணை முதல்வர் சையத் தாஹிர் ஹுசைனி ஆகியோர் கொடியசைத்து தொடங்கி வைத்தனர்.
இந்த விழிப்புணர்வு பேரணியில் 300-க்கும் மேற்பட்ட என்.சி.சி மாணவ-மாணவிகளும், 30 ராணுவப் பயிற்றுநர்கள் மற்றும் பணியாளர்களும் கலந்துகொண்டனர். நகரின் முக்கிய சாலைகள் வழியாகச் சென்ற இப்பேரணி, மீண்டும் கல்லூரியை அடைந்து நிறைவுபெற்றது. இதற்கான ஏற்பாடுகளை இஸ்லாமியா கல்லூரி என்.சி.சி அலுவலர் லெப்டினன்ட் முகமது அசாருதீன் சிறப்பாகச் செய்திருந்தார்.









