திருவாரூர் மாவட்ட ஆட்சியர் பெருந்திட்ட வளாகத்தில் உள்ள மாவட்ட விளையாட்டு அரங்கில் அமைந்துள்ள நீச்சல் குளம், பழுதடைந்த நிலையில் கடந்த 18 மாதங்களுக்கும் மேலாகப் பயன்பாடின்றி பூட்டிக் கிடக்கிறது. இதனால் பள்ளி, கல்லூரி மாணவ, மாணவிகள் மற்றும் பொதுமக்கள் நீச்சல் பயிற்சி பெற முடியாமல் கடும் அவதிக்குள்ளாகி வருகின்றனர்.
உடல் ஆரோக்கியத்தைப் பேணுவதற்கும், சிறந்த விளையாட்டு வீரர்களை உருவாக்கும் நோக்கிலும் தமிழக விளையாட்டு மேம்பாட்டுத் துறை சார்பில் அனைத்து மாவட்ட விளையாட்டு அரங்கங்களிலும் நீச்சல் குளங்கள் அமைக்கப்பட்டு, பயிற்சியாளர்கள் மூலம் பயிற்சி அளிக்கப்பட்டு வருகிறது. அதன்படி, திருவாரூர் மாவட்ட விளையாட்டு அரங்கில் அமைக்கப்பட்ட நீச்சல் குளத்தில், கட்டண அடிப்படையில் மாணவ, மாணவிகள் மற்றும் பொதுமக்களுக்கு காலை 6 மணி முதல் மாலை 6 மணி வரை பயிற்சி வழங்கப்பட்டு வந்தது. கோடை விடுமுறை காலங்களில் சிறப்புப் பயிற்சி வகுப்புகளும் நடத்தப்பட்டன.
இந்நிலையில், நீச்சல் குளத்தின் உடை மாற்றும் அறை மற்றும் குளியல் அறை உள்ளிட்ட வசிகளைக் கொண்ட கட்டிடம் முறையாகப் பராமரிக்கப்படாததால், பல்வேறு இடங்களில் விரிசல் ஏற்பட்டு சேதமடைந்தது. தண்ணீரைச் சுத்திகரிக்கும் இயந்திரம் உள்ளிட்ட உபகரணங்களிலும் பழுதுகள் ஏற்பட்டன. இதன் காரணமாக, பயிற்சிக்கு வருபவர்களின் பாதுகாப்பைக் கருத்தில் கொண்டு கடந்த ஆண்டு ஏப்ரல் மாதம் நீச்சல் குளம் மூடப்பட்டது.
தற்போது 18 மாதங்களாகியும் நீச்சல் குளம் சீரமைக்கப்படாததால், கட்டிடம் மேலும் சிதிலமடைந்து வருகிறது. திருவாரூர் மாவட்டத்தில் வேறு நீச்சல் பயிற்சி வசதிகள் இல்லாததால், ஆர்வமுள்ளவர்கள் அருகிலுள்ள நாகப்பட்டினம் மாவட்டத்திற்குச் செல்ல வேண்டிய சூழல் ஏற்பட்டுள்ளது.
இந்த நீச்சல் குளத்தை சீரமைக்க மாவட்ட விளையாட்டுத் துறை சார்பில் அரசுக்குக் கருத்துரு அனுப்பப்பட்டுள்ளதாகக் கூறப்பட்டாலும், இதுவரை நிதி ஒதுக்கீடு செய்யப்படவில்லை. எனவே, அரசு உடனடியாகத் தலையிட்டு உரிய நிதி ஒதுக்கீடு செய்து, புதிய கட்டிடம் மற்றும் நவீன வசதிகளுடன் கூடிய நீச்சல் குளத்தை விரைவில் பயன்பாட்டுக்குக் கொண்டுவர வேண்டும் என்பதே இப்பகுதி மக்களின் நீண்டநாள் கோரிக்கையாக உள்ளது.









