செங்கல் லாரி கவிழ்ந்து படித்துறை சுவர் இடிந்தது – ஓட்டுநர் கைது

திருச்சி மாவட்டம் முசிறி அருகே சந்தப்பாளையத்தில் செங்கல் ஏற்றிச் சென்ற லாரி சாலையோரத்தில் கவிழ்ந்ததில், வாய்க்கால் படித்துறையின் சுவர் இடிந்து சேதமடைந்தது. இந்த விபத்தில் படித்துறையில் இருந்தவர்கள் அதிர்ஷ்டவசமாக உயிர் தப்பினர்.

தருமபுரி மாவட்டம் அல்லி கிராமத்தைச் சேர்ந்த யுவராஜா என்பவர் நாமக்கல்லில் இருந்து செங்கல் ஏற்றிக்கொண்டு லாரியில் திருச்சி நோக்கி வந்து கொண்டிருந்தார்.

சந்தப்பாளையம் அருகே வந்தபோது, சாலையில் இருந்த வேகத்தடையை கவனிக்காமல் லாரியை வேகமாக இயக்கியதாக கூறப்படுகிறது. மேலும், அவர் மது போதையில் இருந்ததாகவும் கூறப்படும் நிலையில், லாரி கட்டுப்பாட்டை இழந்து சாலையோரத்தில் உள்ள வடகரை வாய்க்கால் கரையில் கவிழ்ந்தது.

படித்துறை சுவர் சேதம்

லாரி கவிழ்ந்ததில், முசிறி நகராட்சி சார்பில் சுமார் ரூ.4 லட்சம் மதிப்பில் கட்டப்பட்டிருந்த வாய்க்கால் படித்துறையின் சுவர் இடிந்து சேதமடைந்தது. லாரி சுவரின் மீது விழுந்து அங்கேயே தேங்கி நின்றது.

அப்போது படித்துறையில் இருந்த சிலர் லாரி கவிழ்ந்ததால் ஏற்பட்ட விபத்தில் சிக்காமல் அதிர்ஷ்டவசமாக உயிர் தப்பினர்.

ஓட்டுநர் கைது

விபத்து குறித்து முசிறி போலீசார் வழக்குப்பதிவு செய்து லாரி ஓட்டுநர் யுவராஜாவை கைது செய்தனர். அவரிடம் தொடர்ந்து விசாரணை நடைபெற்று வருகிறது.

இதனிடையே, சந்தப்பாளையம் பகுதியில் வாகனங்கள் அதிவேகமாக செல்வதை கட்டுப்படுத்தும் வகையில் சாலையில் பேரிகார்டுகள் அமைத்து வேகத்தடுப்பு ஏற்படுத்த வேண்டும் என அப்பகுதி பொதுமக்கள் கோரிக்கை விடுத்துள்ளனர்.