கரூர்: கரூர் மாவட்டம், நெரூர் அருகே உள்ள சின்னகாளிபாளையத்தில், ஒரே குடும்பத்தைச் சேர்ந்த ஐந்து பேர் கிணற்றில் சடலங்களாக மீட்கப்பட்ட சம்பவம் பெரும் அதிர்ச்சியை ஏற்படுத்தியுள்ளது.
வெங்கமேடு கொங்குநகரைச் சேர்ந்த ராமசாமி (63), அவரது மனைவி ஜானகி (60), இவர்களது மகள் சுகுணா (35) மற்றும் சுகுணாவின் குழந்தைகளான சிவானி (10), அதிரன் (4) ஆகிய ஐந்து பேரும் உயிரிழந்த நிலையில் கண்டெடுக்கப்பட்டுள்ளனர். சுகுணாவுக்கும், வேலாயுதம்பாளையத்தைச் சேர்ந்த பிரபு என்பவருக்கும் கடந்த 13 ஆண்டுகளுக்கு முன்பு திருமணம் நடைபெற்றுள்ளது. கருத்து வேறுபாடு காரணமாக, கடந்த 15-ம் தேதி முதல் சுகுணா தனது குழந்தைகளுடன் பெற்றோர் வீட்டில் தங்கியிருந்ததாகக் கூறப்படுகிறது.
இன்று மாலை, சின்னகாளிபாளையத்தில் உள்ள அவர்களது தோட்டத்துக் கிணற்றில் ஐந்து பேரின் உடல்களும் மிதப்பதைக் கண்ட அப்பகுதி மக்கள், உடனடியாக வாங்கல் காவல் நிலையத்திற்குத் தகவல் தெரிவித்தனர். சம்பவ இடத்திற்கு விரைந்த காவல்துறையினர், உடல்களை மீட்டு பிரேதப் பரிசோதனைக்காக அனுப்பி வைத்தனர். குடும்பப் பிரச்சினை காரணமாக இந்தத் துயரச் சம்பவம் நிகழ்ந்ததா அல்லது வேறு ஏதேனும் காரணங்கள் உள்ளனவா என்பது குறித்து தீவிர விசாரணை நடைபெற்று வருகிறது.









