திருப்பத்தூர் மாவட்டம் ஜோலார்பேட்டையைச் சேர்ந்த மாணவி தனிஷ்கா, தேசிய மற்றும் மாநில அளவிலான விளையாட்டுப் போட்டிகளில் சிறந்து விளங்கி பதக்கங்களைக் குவித்து அப்பகுதிக்கு பெருமை சேர்த்துள்ளார்.
சேலத்தில் நடைபெற்ற 67-வது பள்ளி அளவிலான விளையாட்டுப் போட்டிகளில் பங்கேற்ற தனிஷ்கா, 3000 மீட்டர் மற்றும் 1500 மீட்டர் ஓட்டப்பந்தயப் பிரிவுகளில் முதல் இடம் பிடித்து அசத்தினார். அதனைத் தொடர்ந்து, நடைபெற்ற 41-வது தேசிய அளவிலான ஜூனியர் 1000 மீட்டர் ஓட்டப்பந்தயப் போட்டியில் இரண்டாம் இடம் பிடித்து வெள்ளிப் பதக்கம் வென்றார்.
தேசிய அளவில் சாதனை படைத்த மாணவி தனிஷ்காவுக்கு, ஜோலார்பேட்டை விளையாட்டரங்கில் பாராட்டு விழா நடத்தப்பட்டது. முன்னாள் விளையாட்டு வீரரும் பயிற்சியாளருமான சபரி குமார் தலைமையில் நடைபெற்ற இந்நிகழ்ச்சியில், பயிற்சியாளர்கள், சக மாணவ-மாணவிகள் மற்றும் பெற்றோர்கள் கலந்துகொண்டு மாணவிக்கு சால்வை அணிவித்து, இனிப்புகள் வழங்கி வாழ்த்து தெரிவித்தனர்.
தற்போது சென்னை நேரு விளையாட்டு அரங்கில் புகழ்பெற்ற பயிற்சியாளர் கோமதி அவர்களிடம் தனிஷ்கா தீவிர பயிற்சி பெற்று வருகிறார். வரும் காலங்களில் ஜோலார்பேட்டை மற்றும் தமிழகத்தைச் சேர்ந்த இளம் விளையாட்டு வீரர்கள் தேசிய அளவிலான போட்டிகளில் பல பரிசுகளை வென்று சாதனை படைக்க வேண்டும் என்பதே அனைவரின் எதிர்பார்ப்பாக உள்ளது.









