தஞ்சாவூர்: முதலமைச்சர் கோப்பைக்கான மாநில அளவிலான வில்வித்தை போட்டியில், தஞ்சாவூர் அரசர் அரசு உதவி பெறும் மேல்நிலைப்பள்ளி மாணவி ப்ரிணிஷா தங்கப்பதக்கம் வென்று சாதனை படைத்துள்ளார்.
தமிழக அரசின் விளையாட்டு மேம்பாட்டுத் திட்டத்தின் கீழ் ஆண்டுதோறும் நடத்தப்படும் முதலமைச்சர் கோப்பை விளையாட்டுப் போட்டிகளில், தஞ்சாவூர் மாவட்டத்தைச் சேர்ந்த 12-ம் வகுப்பு மாணவி ப்ரிணிஷா வில்வித்தை பிரிவில் பங்கேற்று முதலிடம் பிடித்தார். தனது துல்லியமான இலக்கு மற்றும் விடாமுயற்சியால் தங்கப்பதக்கத்தை வென்று, பள்ளிக்கும் மாவட்டத்திற்கும் பெருமை சேர்த்துள்ளார்.
கடந்த நான்கு ஆண்டுகளாக பயிற்சியாளர் விஜய் என்பவரிடம் முறையான பயிற்சி பெற்று வரும் ப்ரிணிஷா, ஏற்கனவே பல்வேறு மாவட்ட மற்றும் மாநில அளவிலான போட்டிகளில் பதக்கங்களை வென்றுள்ளார். அவரது இந்த தொடர் வெற்றிகள், சக மாணவர்களிடையே பெரும் வரவேற்பைப் பெற்றுள்ளது.
மாணவியின் இந்த சாதனையைப் பாராட்டி, பள்ளியின் தலைமை ஆசிரியர் பழ.பிரகதீசு அவருக்கு வாழ்த்துகளைத் தெரிவித்தார். அப்போது உடற்கல்வி ஆசிரியர்கள் பழனிவேல் மற்றும் சாவித்திரி ஆகியோர் உடனிருந்தனர். கல்வியுடன் விளையாட்டிலும் சிறந்து விளங்கும் ப்ரிணிஷாவின் வெற்றி, மற்ற மாணவர்களுக்கு ஒரு சிறந்த முன்னுதாரணமாக அமைந்துள்ளது.









