பரந்தூர் விமான நிலைய திட்டத்தில் மாற்று இடம் தேர்வு? – நவாஸ்கனி பேட்டி

விவசாயிகளின் வாழ்வாதாரம் மற்றும் வேளாண் நிலங்களுக்கு பாதிப்பு ஏற்படாத வகையில் புதிய விமான நிலையத்திற்கான மாற்று இடம் தேர்வு செய்யப்படும் என தமிழ்நாடு வக்ஃபு வாரியத் தலைவரும், நாடாளுமன்ற உறுப்பினருமான நவாஸ்கனி தெரிவித்துள்ளார்.

விருதுநகரில் நடைபெற்ற இந்திய யூனியன் முஸ்லிம் லீக் (IUML) விருதுநகர் வடக்கு மாவட்ட பொதுக்குழு கூட்டத்தில் பங்கேற்ற அவர், பின்னர் செய்தியாளர்களைச் சந்தித்து பல்வேறு விவகாரங்கள் குறித்து பேசினார்.

கட்சிப் பணிகளை தீவிரப்படுத்த உத்தரவு

தமிழ்நாடு 7 மண்டலங்களாகப் பிரிக்கப்பட்டுள்ளதாகவும், அதில் ஒரு மண்டலப் பொறுப்பாளராக தன்னை நியமித்து 10 மாவட்டங்களுக்கான பொறுப்பு வழங்கப்பட்டுள்ளதாகவும் நவாஸ்கனி தெரிவித்தார்.

உள்ளாட்சித் தேர்தலை முன்னிட்டு கட்சிப் பணிகளை தீவிரப்படுத்தவும், போட்டியிடக்கூடிய இடங்கள் மற்றும் வேட்பாளர்களை அடையாளம் காணும் பணிகளைத் தொடங்கவும் தலைமை அறிவுறுத்தியுள்ளதாக அவர் கூறினார்.

உள்ளாட்சித் தேர்தலில் கூட்டணியில் எத்தனை சதவீத இடங்களில் போட்டியிடுவது என்பது தொடர்பாக இதுவரை கூட்டணித் தலைமையுடன் பேச்சுவார்த்தை நடைபெறவில்லை என்றும், முதலில் கட்சியை தேர்தலுக்கு தயார்படுத்தும் பணிகள் நடைபெற்று வருவதாகவும் தெரிவித்தார்.

வக்ஃபு சொத்துக்கள் மீட்பு

தமிழ்நாடு முழுவதும் ஆக்கிரமிப்பில் உள்ள வக்ஃபு சொத்துக்களை சட்டரீதியாக மீட்க நடவடிக்கைகள் மேற்கொள்ளப்பட்டு வருவதாக நவாஸ்கனி தெரிவித்தார்.

விருதுநகரில் உள்ள பள்ளிவாசலுக்குச் சொந்தமான ரூ.100 கோடிக்கும் அதிகமான மதிப்புள்ள வக்ஃபு சொத்துக்கள், சட்டப் போராட்டத்திற்குப் பிறகு வருவாய்த் துறை ஆவணங்கள் மற்றும் பட்டாக்களில் வக்ஃபு சொத்துக்களாக மாற்றப்பட்டுள்ளதாக அவர் கூறினார்.

தற்போது அந்த சொத்து ஆக்கிரமிப்பில் இருப்பதால், அதனை மீட்பதற்கு மாவட்ட ஆட்சியர் மற்றும் காவல்துறையிடம் அனுமதி கோரப்பட்டுள்ளதாகவும் தெரிவித்தார்.

மேலும், நீதிமன்றங்கள் மற்றும் வக்ஃபு தீர்ப்பாயங்கள் மூலம் வழக்குகள் தொடர்ந்து நடைபெற்று வருவதாகவும், மீட்கப்படும் சொத்துக்கள் மீண்டும் ஆக்கிரமிக்கப்படாத வகையில் அவற்றை உடனடியாக பயன்பாட்டுக்கு கொண்டு வந்து வருவாய் ஈட்ட நடவடிக்கை எடுக்கப்படும் என்றும் கூறினார்.

பரந்தூர் விமான நிலையம் குறித்து முக்கிய கருத்து

சென்னை மீனம்பாக்கம் விமான நிலையம் எதிர்கால தேவைகளுக்கு போதுமானதாக இல்லாததால் புதிய விமான நிலையம் அமைக்க நடவடிக்கை எடுக்கப்பட்டதாக நவாஸ்கனி தெரிவித்தார்.

பரந்தூரில் விமான நிலையம் அமைப்பதற்கான நடவடிக்கைகள் மேற்கொள்ளப்பட்டபோது, விவசாய நிலங்கள் மற்றும் விவசாயிகளின் வாழ்வாதாரம் பாதிக்கப்படும் என எதிர்ப்பு எழுந்ததாக அவர் குறிப்பிட்டார்.

இதனால் விவசாயிகளுக்கு பெரிய அளவில் பாதிப்பு ஏற்படாத வகையில் மாற்று இடத்தை தேர்வு செய்து, இந்திய விமான நிலைய ஆணையத்தின் அனுமதி பெற்று புதிய விமான நிலையம் அமைக்கும் பணிகள் மேற்கொள்ளப்படும் என அவர் தெரிவித்தார்.

பெண்களுக்கு ஆண்டுக்கு 3 இலவச கேஸ் சிலிண்டர்கள்

பெண்களுக்கு ஆண்டுக்கு 3 இலவச சமையல் எரிவாயு சிலிண்டர்கள் வழங்கும் திட்டம் அக்டோபர் மாதம் முதல் தொடங்கப்பட உள்ளதாகவும் நவாஸ்கனி தெரிவித்தார்.

ரூ.2.5 லட்சம் வரை ஆண்டு வருமானம் உள்ளவர்கள் இத்திட்டத்தின் மூலம் பயன்பெறுவார்கள் எனக் கூறிய அவர், எதிர்காலத்தில் வருமான உச்சவரம்பை உயர்த்தவும், கூடுதல் சிலிண்டர்கள் வழங்கவும் கோரிக்கை விடுக்கப்படும் என்றார்.

கூட்டணி குறித்து நவாஸ்கனி

தேர்தல் கூட்டணி என்பது பல்வேறு கட்சிகளின் ஒருங்கிணைந்த உழைப்பின் மூலம் வெற்றியை பெறுவதற்கான அமைப்பு என நவாஸ்கனி தெரிவித்தார்.

கூட்டணியில் இடம்பெறும் அனைத்து கட்சிகளும் இணைந்து பணியாற்றியதாலேயே தேர்தல் வெற்றி சாத்தியமாகிறது என்றும், எனவே “ஒருவரால்தான் மற்றொருவர் வெற்றி பெற்றார்” அல்லது “யாரும் தனியாக நிற்க முடியாது” என்று கட்சிகளை தனித்தனியாக பிரித்துப் பேசுவது சரியாக இருக்காது என்றும் அவர் கூறினார்.