திருச்சியில் நடைபெற்று வரும் பல்வேறு பாலப்பணிகளை மதிமுக முதன்மைச் செயலாளர் துரை வைகோ நேரில் ஆய்வு செய்தார். பின்னர் செய்தியாளர்களை சந்தித்து அவர் பல்வேறு அரசியல் கருத்துகளை தெரிவித்தார்.
திருச்சி–சென்னை தேசிய நெடுஞ்சாலையில் சஞ்சீவி நகர் அருகே காவிரி பாலத்தில் நடைபெற்று வரும் பணிகள் குறித்து பேசிய துரை வைகோ, அந்தப் பணிகள் அக்டோபர் முதல் அல்லது இரண்டாவது வாரத்திற்குள் நிறைவடையும் என அதிகாரிகள் தெரிவித்துள்ளதாக கூறினார்.
மேலும், திருச்சி மெயின்கார்டு கேட் அருகே கடந்த 2022-ம் ஆண்டு தொடங்கப்பட்ட ரயில்வே மேம்பாலப் பணிகளில் தொடர்ந்து காலதாமதம் ஏற்பட்டு வருவதாகவும், அந்தப் பணிகள் அடுத்த ஆண்டு ஆகஸ்ட் மாதத்திற்குள் நிறைவடையும் என தெரிவிக்கப்பட்டுள்ளதாகவும் அவர் கூறினார். மற்ற பாலப்பணிகளும் திட்டமிட்ட காலத்திற்குள் நடைபெற்று வருவதாக தெரிவித்தார்.
பரந்தூர் விமான நிலைய திட்டம் குறித்து கருத்து
கடந்த 15 ஆண்டுகளாக தமிழகத்தை ஆட்சி செய்தவர்கள் புதிய விமான நிலையம் அமைப்பதற்கான போதிய முயற்சிகளை மேற்கொள்ளவில்லை என துரை வைகோ விமர்சித்தார்.
பரந்தூரில் கடந்த திமுக ஆட்சியின்போது விமான நிலையம் அமைக்க இடம் தேர்வு செய்யப்பட்டதாகவும், விவசாயிகளின் எதிர்ப்பு காரணமாக தற்போது முதலமைச்சர் விஜய் அந்தத் திட்டத்தை கைவிட்டுள்ளதாகவும் அவர் தெரிவித்தார்.
அதே நேரத்தில், சென்னைக்கு ஒரு பெரிய விமான நிலையம் அமைப்பது காலத்தின் தேவையாக இருப்பதால், அதற்கான நடவடிக்கையை முதலமைச்சர் மேற்கொள்ள வேண்டும் என்றும் துரை வைகோ வலியுறுத்தினார்.
செங்கோட்டையன் பேச்சுக்கு கண்டனம்
தமிழ்நாட்டின் மூத்த அரசியல்வாதியான செங்கோட்டையன், த.வெ.க.வினருக்கு வழிகாட்டியாக இருந்து வருவதாகக் குறிப்பிட்ட துரை வைகோ, அவர் மதிமுகவை சிறுமைப்படுத்தும் வகையில் பேசியிருக்கக் கூடாது என்றார்.
அவரது பேச்சு மதிமுக தொண்டர்களின் மனதைப் புண்படுத்தியுள்ளதாகவும், நா தவறி அவர் அவ்வாறு பேசியிருக்கலாம் என்றும் தெரிவித்தார். இனிவரும் காலங்களில் இதுபோன்ற கருத்துகளை அவர் தவிர்க்க வேண்டும் எனவும் கேட்டுக்கொண்டார்.
த.வெ.க. இந்தியா கூட்டணிக்கு வர வேண்டும்
மதவாதம் மற்றும் ஊழலுக்கு எதிராகவே இந்தியா கூட்டணி உருவாக்கப்பட்டதாக தெரிவித்த துரை வைகோ, தமிழகத்தில் இந்த இரண்டுக்கும் எதிராக செயல்படும் முதலமைச்சர் விஜய் இந்தியா கூட்டணிக்கு வருவார் என நம்புவதாக கூறினார்.
அவர் இந்தியா கூட்டணியில் இணைவதே தமிழகத்திற்கு நல்லது என்றும் துரை வைகோ தெரிவித்தார். முதலமைச்சர் விஜயை வருங்கால பிரதமர் என த.வெ.க.வினர் கூறுவதில் தவறில்லை என்றும், அவர்கள் ஆர்வத்தின் காரணமாக அவ்வாறு கூறுவதாகவும் அவர் குறிப்பிட்டார்.
த.வெ.க. ஆட்சியை கவிழ்க்க திமுக முயற்சி – துரை வைகோ
த.வெ.க. தமிழகத்தில் மிகப்பெரிய மாற்றத்தை உருவாக்கி ஆட்சியில் அமர்ந்துள்ளதாக துரை வைகோ தெரிவித்தார்.
“த.வெ.க. ஆட்சியை கவிழ்க்க திமுக பல்வேறு முயற்சிகளை மேற்கொண்டு வருகிறது. டெல்லியிலும் அவர்கள் டீல் போட்டுள்ளனர்” என அவர் குற்றம்சாட்டினார்.
இந்த சூழலில் த.வெ.க. கூட்டணி கட்சிகள் ஒற்றுமையாக இருக்க வேண்டும் என்றும், கூட்டணி கட்சியினர் த.வெ.க.வினருக்கு அரசியல் ரீதியாக வழிகாட்ட வேண்டும் என்றும் துரை வைகோ தெரிவித்தார்.
மேலும், சட்டப்பேரவையில் திமுகவினர் “கண்ணாடி கூண்டிற்குள் இருந்து கல்லெறிவது போல்” செயல்பட்டு வருவதாகவும் அவர் விமர்சித்தார்.