விருதுநகர் அருகே உள்ள மேல ஆமத்தூர் கிராமத்தில், கடந்த 18 ஆண்டுகளாகப் பராமரிப்பின்றி இருந்த 'வீரப்புலி ஊரணி'யை தூர்வாரும் பணிகள் உயர் நீதிமன்ற மதுரை கிளை நீதிபதி புகழேந்தியின் முயற்சியால் இன்று முறைப்படி தொடங்கப்பட்டன. இப்பணிக்கான பூமி பூஜையை நீதிபதி புகழேந்தி நேரில் பங்கேற்று தொடங்கி வைத்தார்.
மேல ஆமத்தூர் கிராமத்தில் அமைந்துள்ள வீரப்புலி ஊரணி, கடந்த 18 ஆண்டுகளுக்கும் மேலாக தூர்வாரப்படாமல் இருந்ததால், மழைக்காலங்களில் தண்ணீரைத் தேக்கி வைக்க முடியாத அவல நிலை நீடித்து வந்தது. இந்நிலையில், தனது சொந்த ஊரில் அமைந்துள்ள இந்த நீர்நிலையைத் தூர்வாரிப் பயன்பாட்டுக்குக் கொண்டுவர நீதிபதி புகழேந்தி முடிவு செய்தார்.
இதனைத் தொடர்ந்து, 'கடைமடை பகுதி ஒருங்கிணைந்த விவசாயிகள் சங்கத்துடன்' இணைந்து இந்த ஊரணியை முழுமையாகத் தூர்வாரும் பணிகள் திட்டமிடப்பட்டன. இப்பணிகளுக்கான ஒட்டுமொத்த நிதியையும் நீதிபதி புகழேந்தியே முழுமையாக ஏற்றுக்கொண்டுள்ளார். இதனையடுத்து, இன்று நடைபெற்ற நிகழ்வில் தூர்வாரும் பணிக்கான பூமி பூஜையை அவரே முன்னின்று தொடங்கி வைத்தார்.
விரைவில் தொடங்க உள்ள வடகிழக்குப் பருவமழைக்கு முன்பாக ஊரணியை முழுமையாகத் தூர்வாரி, மழைநீரைத் தேக்குவதற்கான அனைத்து முயற்சிகளும் தீவிரமாக மேற்கொள்ளப்பட்டு வருவதாக ஒருங்கிணைப்பாளர்கள் தரப்பில் தெரிவிக்கப்பட்டுள்ளது. நீதிபதியின் இந்த மக்கள் நலப் பணிக்கு அப்பகுதி பொதுமக்கள் மற்றும் விவசாயிகள் தங்களது நெஞ்சார்ந்த நன்றியையும் பாராட்டுகளையும் தெரிவித்து வருகின்றனர்.