திருப்பதி ஏழுமலையான் கோயிலில் ஜூன் மாதத்தில் 1.27 கோடி லட்டுகள் விற்று சாதனை

கலியுகத்தின் வாழும் தெய்வமான திருப்பதி ஏழுமலையான் கோயிலில் சுவாமியை தரிசித்த பிறகு, பக்தர்கள் மிகுந்த பக்தியுடன் பெறும் லட்டு பிரசாதத்தின் விற்பனை, இந்த ஆண்டு ஜூன் மாதத்தில் சாதனை அளவை எட்டியுள்ளது. பக்தர்களின் கூட்டம் அதிகரித்துள்ளதைக் கருத்தில் கொண்டு, திருமலை திருப்பதி தேவஸ்தானம் லட்டு உற்பத்தியை பெருமளவில் அதிகரித்து, எந்தவித பற்றாக்குறையுமின்றி பிரசாதத்தை வழங்கி வருகிறது. இந்த ஆண்டு ஏப்ரல் மாதத்தில் 1,11,96,170 லட்டுகளும், மே மாதத்தில் 1,21,35,528 லட்டுகளும், ஜூன் மாதத்தில் 1,26,81,805 லட்டுகளும் விற்பனையாகியுள்ளன. கடந்த மூன்று மாதங்களுடன் ஒப்பிடும்போது ஜூன் மாதத்தில் லட்டு விற்பனை கணிசமாக அதிகரித்துள்ளது. இதற்கிடையில், ஜூன் 2024-ல் 1,02,64,364 லட்டுகளும், ஜூன் 2025-ல் 1,19,21,353 லட்டுகளும், ஜூன் 2026-ல் 1,26,81,805 லட்டுகளும் விற்பனையாகியுள்ளன. இதன் மூலம் கடந்த ஆண்டு ஜூன் மாதத்தை விட 7,59,452 லட்டுகள் கூடுதலாக விற்பனையாகியுள்ளன இது 6.37 சதவிகித வளர்ச்சியாகும். இதேபோல், 2024-ஐ விட 24,17,441 லட்டுகள் கூடுதலாக விற்பனையாகியுள்ளன இது 23.55 சதவிகித வளர்ச்சியாகும். சாமி தரிசனம் பெற திருமலைக்கு வரும் பக்தர்களின் எண்ணிக்கை அதிகரித்து வருவதால் திருமலை திருப்பதி தேவஸ்தானம் லட்டு பிரசாதம் தயாரித்து விநியோகிப்பதில் திறம்பட திட்டமிட்டு, பக்தர்களுக்கு எவ்வித இடையூறும் இன்றி தொடர்ச்சியான சேவைகளை வழங்கி வருவதால் இந்த அளவிற்கு லட்டு விற்பனை அதிகரித்துள்ளது.