தமிழகத்தில் முதல் கட்டமாக 52 முக்கிய கோவில்களில் கேமரா வசதியுள்ள செல்போன்களை கொண்டு செல்ல செப்டம்பர் 1 முதல் தடை அமலுக்கு வந்துள்ளது. அதே நேரத்தில், கேமரா வசதி இல்லாத செல்போன்களுக்கு இந்தக் கட்டுப்பாடு பொருந்தாது என அறநிலையத்துறை அமைச்சர் ரமேஷ் தெரிவித்துள்ளார்.
கோவில்களின் புனிதத்தன்மை மற்றும் ஆன்மிக சூழலை பாதுகாக்கும் நோக்கில் இந்த நடவடிக்கை மேற்கொள்ளப்பட்டுள்ளது. பல கோவில்களில் செல்போன் மூலம் புகைப்படம், வீடியோ, செல்பி மற்றும் ரீல்ஸ் பதிவு செய்யப்படுவது தொடர்பாக புகார்கள் எழுந்ததைத் தொடர்ந்து, 52 கோவில்களில் இந்த கட்டுப்பாடு அமல்படுத்தப்பட்டுள்ளது.
இதுகுறித்து அமைச்சர் ரமேஷ் கூறுகையில், கேமரா வசதியுள்ள செல்போன்களுக்கு மட்டுமே கோவில்களுக்குள் கொண்டு செல்ல கட்டுப்பாடு விதிக்கப்பட்டுள்ளது. கேமரா இல்லாத செல்போன்களை பக்தர்கள் கொண்டு செல்ல எந்த தடையும் இல்லை எனத் தெரிவித்தார்.
முதல் கட்டமாக திருச்செந்தூர், பழனி, திருப்பரங்குன்றம், திருவண்ணாமலை, சமயபுரம், ஸ்ரீரங்கம், நெல்லையப்பர், சுசீந்திரம், மதுரை அழகர் கோவில், ராமேசுவரம் உள்ளிட்ட 52 முக்கிய கோவில்களில் இந்த நடைமுறை அமல்படுத்தப்பட்டுள்ளது.
கேமரா வசதியுள்ள செல்போன்களை கொண்டு வரும் பக்தர்களுக்காக, கோவில் நிர்வாகங்கள் பாதுகாப்பு பெட்டக வசதிகளை ஏற்படுத்தியுள்ளன. பெரிய கோவில்களில் ஆயிரக்கணக்கான செல்போன்களை பாதுகாப்பாக வைத்திருக்க ஏற்பாடுகள் செய்யப்பட்டுள்ளதாகவும் தெரிவிக்கப்பட்டுள்ளது.