கர்நாடக மாநிலம் மைசூரில் நடைபெற்ற தேசிய பிகில் பால் (Beep Ball) போட்டியில் இரண்டு தங்கப் பதக்கங்களை வென்று விருதுநகர் மாவட்டத்திற்கு பெருமை சேர்த்துள்ள மாற்றுத்திறனாளி வீரர் வேணுகோபாலை, விருதுநகர் சட்டமன்ற உறுப்பினர் எஸ்.பி. செல்வம் நேரில் சந்தித்து பாராட்டு தெரிவித்தார்.
விருதுநகர் மாவட்டம் அருப்புக்கோட்டை அஜிஸ் நகரைச் சேர்ந்த மாற்றுத்திறனாளி வீரர் வேணுகோபால், மைசூரில் நடைபெற்ற தேசிய அளவிலான பிகில் பால் போட்டியில் பங்கேற்று இரண்டு தங்கப் பதக்கங்களை வென்றார். இவரது திறமையை அங்கீகரிக்கும் வகையில், இவர் அடுத்ததாக நடைபெறவுள்ள ஆசியப் போட்டிக்கும் இந்திய அணியின் சார்பில் தேர்வு செய்யப்பட்டுள்ளார்.
தேசிய அளவில் சாதனை படைத்த வேணுகோபால், விருதுநகர் சட்டமன்ற உறுப்பினர் எஸ்.பி. செல்வத்தை நேரில் சந்தித்து வாழ்த்துப் பெற்றார். அப்போது, வீரரின் சாதனையைப் பாராட்டிய சட்டமன்ற உறுப்பினர், வரவிருக்கும் ஆசியப் போட்டியிலும் தங்கம் வென்று நாட்டிற்கும், விருதுநகர் மாவட்டத்திற்கும் பெருமை சேர்க்க வேண்டும் என தனது வாழ்த்துகளைத் தெரிவித்தார்.