அரியலூர் மாவட்டத்தில் முதலமைச்சர் கோப்பை மாநில அளவிலான ஹாக்கிப் போட்டிகள் வருகின்ற அக்டோபர் 16ஆம் தேதி தொடங்கவுள்ளது என மாவட்ட ஆட்சித்தலைவர் திருமதி ந.மிருணாளினி தெரிவித்துள்ளார்.
அரியலூர் மாவட்ட ஆட்சியரகக் கூட்டரங்கில், தமிழ்நாடு விளையாட்டு மேம்பாட்டு ஆணையம் சார்பில் முதலமைச்சர் கோப்பை மாநில அளவிலான ஹாக்கிப் போட்டி நடத்துவது தொடர்பான முன்னேற்பாடு பணிகள் குறித்த ஆலோசனைக் கூட்டம் மாவட்ட ஆட்சித்தலைவர் திருமதி ந.மிருணாளினி தலைமையில் நடைபெற்றது. இக்கூட்டத்தில் மாவட்ட காவல் கண்காணிப்பாளர் திரு. சு.செல்வகுமார் உள்ளிட்டோர் பங்கேற்றனர்.
இக்கூட்டத்தில் மாவட்ட ஆட்சித்தலைவர் தெரிவித்த விவரங்கள்:
- அரியலூர் மாவட்ட விளையாட்டு அரங்கில் மாநில அளவிலான முதலமைச்சர் கோப்பை ஹாக்கிப் போட்டிகள் வருகின்ற 16.10.2026 முதல் 21.10.2026 வரை பள்ளி அளவிலும், 22.10.2026 முதல் 27.10.2026 வரை கல்லூரி அளவிலும் நடைபெறும்.
- இப்போட்டிகளில் தமிழகத்தின் 38 மாவட்டங்களைச் சேர்ந்த ஹாக்கி விளையாட்டு வீரர்கள் கலந்துகொள்ள உள்ளனர்.
- போட்டிகளில் பங்கேற்கும் வீரர்களுக்கு உணவு, தங்குமிடம், போக்குவரத்து, குடிநீர், மருத்துவம் மற்றும் கழிவறை உள்ளிட்ட அடிப்படை வசதிகளை தடையின்றி செய்து தர தொடர்புடைய துறை அலுவலர்களுக்கு உத்தரவிடப்பட்டுள்ளது.
இக்கூட்டத்தில் மாவட்ட வருவாய் அலுவலர் திருமதி க.ரா.மல்லிகா, மாவட்ட விளையாட்டு மற்றும் இளைஞர் நலன் அலுவலர் லெனின் மற்றும் துறை சார்ந்த அலுவலர்கள் உடனிருந்தனர்.