மயிலாடுதுறை மாவட்டம் தரங்கம்பாடி தாலுக்கா திருமெய்ஞானத்தில் அமைந்துள்ள பழமை வாய்ந்த பிரம்மபுரீஸ்வரர் கோயிலில், ஐப்பசி மாத அஸ்வினி நட்சத்திரத்தை முன்னிட்டு அன்னாபிஷேகம் வெகுவிமரிசையாக நடைபெற்றது.
இந்து சமய அறநிலையத்துறைக்கு சொந்தமானதும், அப்பர், சம்பந்தர், சுந்தரர் ஆகிய மூவராலும் பாடல் பெற்றதுமான ஸ்ரீ ஆம்ல குஜாம்பிகா சமேத பிரம்மபுரீஸ்வரர் கோயிலில் இந்த சிறப்பு வழிபாடுகள் நடத்தப்பட்டன.
அன்னாபிஷேகத்தை முன்னிட்டு மூலவர் பிரம்மபுரீஸ்வரருக்கு பால், பன்னீர், தேன், சந்தனம் உள்ளிட்ட பல்வேறு வாசனை திரவியங்களால் சிறப்பு அபிஷேகங்கள் செய்யப்பட்டன. அதனைத் தொடர்ந்து, சாதம் மற்றும் பல்வேறு வகையான காய்கறிகள், பழங்களைக் கொண்டு சுவாமிக்கு வண்ணமயமான அலங்காரம் செய்யப்பட்டு, மகாதீபாராதனை காண்பிக்கப்பட்டது.
இந்த வழிபாட்டில் இப்பகுதியைச் சேர்ந்த திரளான பக்தர்கள் கலந்து கொண்டு சுவாமி தரிசனம் செய்தனர். வழிபாட்டிற்குப் பின்னர், கோயிலுக்கு வருகை தந்திருந்த அனைத்து பக்தர்களுக்கும் அன்னாபிஷேக பிரசாதம் மற்றும் அன்னதானம் வழங்கப்பட்டது.