கோவையில் உள்ள அருள்மிகு ஸ்ரீ பிளேக் மாரியம்மன் கோவிலில், ஸ்ரீ மதி கீதா ராகவன் அறக்கட்டளை சார்பில் இரண்டாம் ஆண்டு ஸ்ரீ மஹா சுதர்சன மற்றும் ஸ்ரீ மஹா சண்டி ஹோமங்கள் ஆன்மிகப் பெரியோர்கள் மற்றும் முக்கியப் பிரமுகர்கள் பங்கேற்புடன் சிறப்பாக நடைபெற்றன.
கோவையின் அவினாசி சாலை சின்னியம்பாளையத்தில் அமைந்துள்ள இக்கோவிலில், சாரதா நவராத்திரி உத்ஸவத்தை முன்னிட்டு கடந்த அக்டோபர் 17 மற்றும் 18 ஆகிய தேதிகளில் இந்த ஆன்மிக நிகழ்ச்சிகள் நடத்தப்பட்டன. ஸ்ரீஸ்ரீஸ்ரீ சங்கராச்சார்யார் சுவாமிகளின் அனுக்ரஹம் மற்றும் ஆசியுடன் இந்நிகழ்ச்சி ஏற்பாடு செய்யப்பட்டது.
குறிப்பாக, அக்டோபர் 18ஆம் தேதி துர்காஷ்டமி தினத்தில் காலை 7 மணி முதல் மதியம் 2 மணி வரை ஸ்ரீ மஹா சண்டி ஹோமம் நடைபெற்றது. உலக நன்மை, பொதுமக்களின் நலன், குடும்பங்களில் அமைதி மற்றும் வளம் பெருக வேண்டி வேத மந்திரங்கள் முழங்க சிறப்பு வழிபாடுகள் நடத்தப்பட்டன. இதில் திரளான பக்தர்கள் கலந்து கொண்டு வழிபாடு மேற்கொண்டனர்.
இந்நிகழ்ச்சிக்கு பல்வேறு ஆன்மிகப் பெரியோர்கள் தங்களது அருளாசிகளை வழங்கினர். பேரூர் ஆதீனத்தின் 24ஆம் பட்டம் முதுமுனைவர் கயிலைக் குருமணி சாந்தலிங்க இராமசாமி அடிகளார், 25ஆம் பட்டம் குருமகாசந்நிதானம் சாந்தலிங்க மருதாசல அடிகளார், சிரவை ஆதீனத்தின் நான்காம் பட்டம் குருமகாசந்நிதானம் இராமானந்த குமரகுருபர சுவாமிகள், ஸ்ரீமன் கொங்கு மண்டலம் நாராயண ராமானுஜர் ஜீயர் சுவாமிகள் ஆகியோர் ஆசி வழங்கினர்.
மேலும், கோவை காமாட்சிபுரி ஆதீனம் சாத்த ஸ்ரீ பஞ்சலிங்கேஸ்வர சுவாமிகள், ஸ்ரீ விஷ்வலிங்க தம்பிரான் சுவாமிகள், மதுரை ஆதீனம் மற்றும் மலுமிச்சம்பட்டி நாகசக்தி அம்மன் தியான பீடத்தின் நிலவேம்பு சித்தர் ஜகத்குரு ஸ்ரீலஸ்ரீ சிவ சண்முக சுந்தர பாபுஜி சுவாமிகள் உள்ளிட்டோரும் பங்கேற்று ஆசி வழங்கினர்.
இந்த ஆன்மிக விழாவில் இந்து முன்னணி மாநிலத் தலைவர் காடேஸ்வரா சுப்பிரமணியம், சூலூர் சட்டமன்றத் தொகுதி உறுப்பினர் சுகுமார் உள்ளிட்ட முக்கியப் பிரமுகர்கள் மற்றும் பொதுமக்கள் கலந்துகொண்டனர். விழாவுக்கான ஏற்பாடுகளை அறக்கட்டளைப் பொறுப்பாளர்கள் ஆர். கிருஷ்ணமூர்த்தி சர்மா, வி. ஹரிஹர சர்மா, எம். பொன்னுசாமி, எஸ்.ஏ. சந்திரசேகர் மற்றும் சி. கோபி ஆகியோர் செய்திருந்தனர்.