தமிழகத்தில் கோவில்களின் புனிதத்தன்மை மற்றும் வழிபாட்டு நடைமுறைகளை பாதுகாக்கும் வகையில், கோவில் வளாகங்களுக்குள் செல்போன் பயன்பாட்டை கட்டுப்படுத்தும் நடவடிக்கைகள் தீவிரப்படுத்தப்பட்டுள்ளன.
கோவில்களுக்கு வரும் பக்தர்கள் வழிபாட்டில் முழுமையாக கவனம் செலுத்தும் வகையிலும், செல்போன்களில் புகைப்படம் மற்றும் வீடியோ எடுப்பதால் ஏற்படும் இடையூறுகளை தவிர்க்கும் வகையிலும் இந்த நடவடிக்கை மேற்கொள்ளப்படுவதாக தெரிவிக்கப்பட்டுள்ளது. தமிழகத்தில் கோவில்களுக்குள் செல்போன் உள்ளிட்ட மின்னணு சாதனங்களை பயன்படுத்துவதற்கு கட்டுப்பாடு விதிக்க வேண்டும் என்ற உத்தரவு ஏற்கனவே சென்னை ஐகோர்ட்டால் பிறப்பிக்கப்பட்டுள்ளது.
இதனை தொடர்ந்து, கோவில் நிர்வாகங்கள் பக்தர்களிடம் விழிப்புணர்வு ஏற்படுத்துவதுடன், செல்போன்களை பாதுகாப்பாக ஒப்படைக்கும் வகையில் தேவையான வசதிகளை ஏற்படுத்த வேண்டும் என அறிவுறுத்தப்பட்டு வருகிறது. குறிப்பாக முக்கியமான கோவில்களில் பாதுகாப்பு ஏற்பாடுகள் மற்றும் கண்காணிப்பை அதிகரிக்கவும் நடவடிக்கை மேற்கொள்ளப்படுகிறது.
மேலும், கோவில்களுக்கு வருகை தரும் முக்கிய பிரமுகர்களின் நிகழ்ச்சிகளால் சாதாரண பக்தர்களின் தரிசனத்திற்கு இடையூறு ஏற்படக்கூடாது என்றும் இந்து சமய அறநிலையத்துறை அறிவுறுத்தியுள்ளது. அனைத்து பக்தர்களுக்கும் சமமான முறையில் தரிசன வசதி கிடைப்பதை உறுதி செய்ய வேண்டும் என்றும் வலியுறுத்தப்பட்டுள்ளது.
செல்போன் கட்டுப்பாடு முழுமையாக நடைமுறைக்கு வரும் நிலையில், பக்தர்கள் கோவில் நிர்வாகத்தின் அறிவுறுத்தல்களை பின்பற்றி ஒத்துழைக்க வேண்டும் என எதிர்பார்க்கப்படுகிறது. இதன் மூலம் கோவில் வளாகங்களில் அமைதியான மற்றும் ஆன்மிக சூழலை பாதுகாக்க முடியும் என அதிகாரிகள் கருதுகின்றனர்.