திருப்பூர் மாநகரம் நல்லூர் அருகே உள்ள பள்ளக்காட்டுப்புதூரில், அருள்மிகு மந்திரகிரி வேலாயுத சுவாமி திருக்கோவிலுக்குச் சொந்தமானதாக சென்னை உயர் நீதிமன்றம் தீர்ப்பளித்த 28 ஏக்கர் நிலத்தில் மரக்கன்றுகள் நடுவதற்குச் சென்ற இந்து சமய அறநிலையத்துறை மற்றும் மாநகராட்சி அதிகாரிகளுக்கு அப்பகுதி மக்கள் கடும் எதிர்ப்பு தெரிவித்ததால் பரபரப்பு ஏற்பட்டது.
பள்ளக்காட்டுப்புதூர் பகுதியில் உள்ள இந்த நிலத்தில் தலைமுறை தலைமுறையாக வசித்து வருவதாகக் கூறும் 50 குடும்பங்களைச் சேர்ந்த மக்கள், அதிகாரிகளின் நடவடிக்கைக்கு எதிர்ப்புத் தெரிவித்தனர். இதையடுத்து, இந்து சமய அறநிலையத்துறை அதிகாரிகள் மற்றும் வருவாய்த்துறையினர் நல்லூர் காவல் நிலையத்தில் புகார் அளித்துள்ளனர்.
இதுகுறித்து அப்பகுதி மக்கள் கூறுகையில், தாங்கள் ஐந்து தலைமுறைகளாகவும், சுமார் 135 ஆண்டுகளாகவும் இந்த நிலத்தை அனுபவித்து வருவதாகத் தெரிவித்தனர். தங்களது பூர்வீக நிலம் தொடர்பாக கோவை மற்றும் திருப்பூர் நீதிமன்றங்களில் தொடரப்பட்ட வழக்குகளில் தங்களுக்குச் சாதகமாகத் தீர்ப்புகள் கிடைத்ததாகவும் கூறினர்.
இதனை எதிர்த்து கடந்த 2003ஆம் ஆண்டு இந்து சமய அறநிலையத்துறை சார்பில் சென்னை உயர் நீதிமன்றத்தில் வழக்கு தொடரப்பட்டதாகவும், சுமார் 23 ஆண்டுகளாக நடைபெற்ற வழக்கில் தற்போது நிலம் கோவிலுக்குச் சொந்தமானது எனத் தீர்ப்பளிக்கப்பட்டுள்ளதாகவும் அவர்கள் தெரிவித்தனர்.
இந்தத் தீர்ப்பை எதிர்த்து உச்ச நீதிமன்றத்தில் மேல்முறையீடு செய்யத் திட்டமிட்டுள்ளதாகவும், அதற்கான கால அவகாசம் இருப்பதாகக் கூறப்படும் நிலையில், அதிகாரிகள் திடீரென நிலத்தில் மரக்கன்றுகள் நட முயல்வது ஏற்கத்தக்கதல்ல என்றும் குற்றம்சாட்டினர்.
மேலும், நிலத்தில் கால்நடைகளுக்குத் தேவையான தீவனங்களைப் பயிரிட்டு வருவதாகவும், தங்களிடம் பட்டா, பாஸ் புத்தகம் உள்ளிட்ட ஆவணங்கள் இருப்பதாகவும் தெரிவித்தனர். உரிய அறிவிப்பு வழங்காமல் ஜேசிபி இயந்திரங்களைக் கொண்டு வந்து பணிகளை மேற்கொள்ள முயல்வதாகவும் அவர்கள் புகார் தெரிவித்தனர்.
இதற்கிடையே, கோவில் நிலத்தில் மரக்கன்றுகள் நடும் நடவடிக்கைக்கு எதிராக மக்கள் திரண்டதால் அப்பகுதியில் பதற்றமான சூழல் நிலவியது. நிலத்தின் உரிமை, நீதிமன்றத் தீர்ப்பின் அமலாக்கம் மற்றும் மேல்முறையீடு தொடர்பான அடுத்தகட்ட நடவடிக்கைகள் குறித்து எதிர்பார்ப்பு ஏற்பட்டுள்ளது.