அவதூறு பேச்சுக்களை ஆதரிப்பதில் அதிமுக பொதுச்செயலாளர் எடப்பாடி பழனிசாமியும், ஆளுங்கட்சியான திமுகவும் ஒரே நிலைப்பாட்டைக் கொண்டுள்ளதாக வருவாய் மற்றும் பேரிடர் மேலாண்மைத் துறை அமைச்சர் கே.கே.எஸ்.எஸ்.ஆர். ராமச்சந்திரன் திருச்சி விமான நிலையத்தில் தெரிவித்தார்.
திருச்சி விமான நிலையத்தில் செய்தியாளர்களைச் சந்தித்துப் பேசிய அமைச்சரிடம், தமிழ்நாட்டின் கடன் சதவீதம் 21 சதவீதம் குறைந்துள்ளது குறித்த கேள்வி எழுப்பப்பட்டது. அதற்கு பதிலளித்த அவர், இதுகுறித்து நிதியமைச்சர் ஏற்கனவே விரிவான விளக்கம் அளித்துள்ளதாகவும், ஒவ்வொரு திட்டத்தின் மதிப்பீடுகளும் குறைக்கப்பட்டு முறையாகச் செயல்படுத்தப்பட்டு வருவதாகவும் குறிப்பிட்டார். மேலும், பல்வேறு துறைகள் மூலம் கூடுதல் வருவாயை ஈட்டத் தேவையான நடவடிக்கைகள் எடுக்கப்பட்டு வருவதாகவும் அவர் தெரிவித்தார்.
திமுக ஆட்சிக் காலத்தில் மழைநீர் வடிகால் பணிகள் மேற்கொள்ளப்பட்டதாக முன்னாள் அமைச்சர் கே.என். நேரு தெரிவித்த கருத்து குறித்த கேள்விக்கு பதிலளித்த அமைச்சர், ஒவ்வொரு அரசும் தன் காலக்கட்டத்தில் பணிகளைச் செய்ய வேண்டியது கடமையாகும் என்றார். மேலும், கடந்த நான்கு மாதங்களில் அரசு அந்தப் பணிகளை மேலும் விரைவுபடுத்தி முடித்துள்ளதாகவும் அவர் சுட்டிக்காட்டினார்.
முதலமைச்சர் குறித்து அவதூறாகப் பேசியவர்கள் கைது செய்யப்பட்டது தொடர்பான கேள்விக்கு பதிலளித்த அவர், அரசியலில் நாகரிகமும் கண்ணியமும் மிக முக்கியமானது என்றார். திராவிட இயக்கத்தின் கொள்கை வழியிலும், அறிஞர் அண்ணா மற்றும் எம்.ஜி.ஆர் வழியிலும் பயணிப்பவர்கள் காலத்திற்கேற்ப கண்ணியமான பேச்சைக் கடைப்பிடிக்க வேண்டும் என்று குறிப்பிட்ட அவர், அவதூறு பேச்சுக்களை ஆதரிப்பதில் எடப்பாடி பழனிசாமியும் திமுகவும் ஒன்றுதான் என விமர்சித்தார்.